मौसम खुलेसँगै मनमोहक हिमशृङ्खला (फोटो फिचर)

काठमाण्डौ - मनसुन बाहिरिएसँगै खुलेको आकाश, हिमालको मनमोहक दृश्य, खेतबारीमा व्यस्त किसान र आकाशमा उडिरहेका प्याराग्लाइडिङले शरद ऋतुको सुन्दरता झल्काएको छ ।

आकाश खुलेसँगै मुस्कुराएका हिमशृङ्खलाले प्रकृतिलाई थप सुन्दर बनाएको छ । ओखलढुङ्गाको जन्तरधापदेखि पोखराको फूलबारी र बागलुङको सिगाना कोटसम्मबाट देखिएका हिमालले आफ्नो सौन्दर्य छरिरहेका छन् । कहिले बादलभित्र हराउने, त कहिले घामसँगै चम्किने हिमालले पर्यटकलाई लोभ्याएको छ। हिमाल खुलेसँगै पर्यटकीय गतिविधि पनि बढ्न थालेका छन् ।

टाढा टाढाबाट आएका आन्तरिक तथा बाह्य पर्यटक हिमाली दृश्यमा रमाइरहेका छन् । यता, घाम लाग्न थालेपछि किसानलाई पाकेको बाली भित्र्याउने चटारो छ। माछापुच्छ्रेको मनमोहक पृष्ठभूमिमा पोखराका किसान खेतमा धान काट्न व्यस्त छन् । हिमालको काखमा पहेँलिँदै गरेको धानबाली भित्र्याउन किसान जुटेका हुन् ।

प्रकृतिको यही सुन्दर परिवेशमा साहसिक पर्यटनले पनि रौनकता थपेको छ । आकाशमा उडिरहेका प्याराग्लाइडिङले खुलेको मौसमलाई रोमाञ्चक बनाएका छन् । हिमालको सुन्दरता, खेतबारीमा किसानको व्यस्तता र आकाशमा उडिरहेका प्याराग्लाइडिङ – यी सबै दृश्यले मौसम खुलेसँगै प्रकृतिमात्र होइन, जनजीवन पनि नयाँ उत्साहले भरिएको छ ।

तस्वीरहरू : नवराज कार्की, कृष्ण दवाडी, वासुदेव पौडेल, खेमराज गौतम, राम थापा, राधिका कँडेल (रासस)