फ्रान्समा महँगी र कमजोर सार्वजनिक सेवाविरुद्ध तेस्रो हप्ता पनि प्रदर्शन

बढ्दो महँगी र कमजोर सार्वजनिक सेवाको विरोधमा फ्रान्सभर लाखौँ नागरिकले प्रदर्शन गरेका छन् ।

आउँदो केही दिनभित्र देशव्यापी आमहडतालको तयारी भइरहेका बेला राजधानी पेरिससहित विभिन्न शहरमा लगातार तेस्रो हप्ता पनि विरोध प्रदर्शन भइरहेको बीबीसीले जनाएको छ ।

पेरिसमा प्रदर्शनकारी र प्रहरीबीच झडप हुँदा प्रहरीले अश्रुग्यास प्रहार गरेको छ । दुई हप्ताअघि भएको हिंसा, तोडफोड र लुटपाटको घटना फेरि नदोहोरियोस् भन्ने उद्देश्यले सुरक्षा व्यवस्था कडा पारिएको छ ।

फ्रान्सको गृह मन्त्रालयका अनुसार हिजो देशभर तीन लाख २० हजारभन्दा धेरै मानिस प्रदर्शनमा सहभागी भएका भएका छन् भने प्रदर्शनका क्रममा २९० जनाभन्दा धेरै पक्राउ परेका छन् ।

पेरिसमा मात्रै ७० हजार मानिसले प्रदर्शन गरे । यसैबीच, फ्रान्समा भइरहेको आन्दोलनको प्रभाव युरोपका अन्य देशमा समेत देखिएको छ । अल्बानिया, जर्मनी र इटालीमा पनि युवाहरूले विभिन्न माग राख्दै प्रदर्शन गरेका छन् ।

युरोपका विभिन्न देशमा युवाहरू सडकमा आएसँगै महँगी, सार्वजनिक सेवाको अवस्था र जनजीवनसँग जोडिएका मुद्दामा असन्तुष्टि बढ्दै गएको खबरमा उल्लेख छ ।