एनपीएलमा आज जनकपुर र पोखरा खेल्दै

काठमाण्डौ – नेपाल प्रिमियर लिग (एनपीएल) मा आज जनकपुर बोल्ट्स र पोखरा एभेन्जर्स खेल्दैछन् ।

यो खेल त्रिवि अन्तर्राष्ट्रिय क्रिकेट रंगशालामा बेलुकी ५ बजे शुरु हुनेछ । जनकपुरले दुई खेलमध्ये एकमा जीत र अर्कोमा हार बेहोरेको छ । त्यस्तै पोखरा आफ्नो पहिलो खेलमा सुदूरपश्चिम रोयल्ससँग ६ विकेटले पराजित भएको थियो ।

यसअघि हिजो सुदूरपश्चिमलाई ३५ रनले पराजित गर्दै विराटनगरले पहिलो जीत निकालेको छ । वर्षाका कारण पाँच ओभरमा घटाइएको खेलमा विराटनगरले दिएको १०६ रनको लक्ष्य पछ्याएको सुदूरपश्चिमले निर्धारित पाँच ओभरमा ३ विकेट गुमाएर ७० रन मात्रै बनाउन सक्यो ।

वर्षाका कारण लुम्बिनी र चितवनको खेल हुन सकेन । दुवै टोलीले समान एक/एक अंक बाँडेका छन् ।