नेपालले यूएईलाई दियो १५४ रनको सामान्य लक्ष्य

काठमाण्डौ - ओमानमा जारी यू–१९ एसिया कपमा नेपालले संयुक्त अरब इमिरेट्स (यूएई)लाई १५४ रनको सामान्य लक्ष्य दिएको छ। नेपाल ४१ ओभरमै १५३ रन बनाएर अलआउट भएको हो । 

टस हारेर पहिले ब्याटिङ गरेको नेपालका लागि सोहिल कुँवरले सर्वाधिक ३३ रन बनाए । सचिन भट्टले ३२ रन बनाए । नीरजकुमार यादव र दर्शन सोनारले समान १६ रन बनाउनुबाहेक अन्य ब्याट्सम्यानले राम्रो प्रदर्शन गर्न सकेनन्।

यूएईका निशाम खानले पाँच विकेट लिए । आयान मिसवाहले तीन तथा नुरुल्लाह अयोबीले दुई विकेट लिए । दुवै टोली प्रतियोगिताको पहिलो खेलमा पराजित भएका थिए। नेपाल भारतसँग तथा यूएई पाकिस्तानसँग पराजित भएको थियो।

समूह ‘ए’मा भारत र पाकिस्तानले समान दुई अङ्क जोड्दा नेपाल र यूएई अङ्कविहीन छन् । नेपालले समूह चरणको अन्तिम खेलमा पर्सि मंगलबार पाकिस्तानसँग खेल्नेछ ।