त्रिवि क्रिकेट रङ्गशालाको पिचबारे असन्तुष्टि

काठमाण्डौ – तेस्रो संस्करणको नेपाल प्रिमियर लिग (एनपीएल) भैरहेको त्रिवि क्रिकेट रङ्गशालाको पिचमा पछिल्ला खेलहरूमा उच्च स्कोरको रन बन्न सकिरहेको छैन । ब्याटरका लागि पिच चुनौतीपूर्ण देखिँदा बलरले त्यसको फाइदा उठाइरहेका छन् ।

शुक्रबार भएका दुवै खेलमा बनेका कम योगफल र त्यसलाई पछ्याउने क्रममा देखिएको संघर्षले प्रतियोगिताको पिचबारे प्रश्न उठाएको छ ।

हिजो शुक्रबार भएको पहिलो खेलमा सुदूरपश्चिम रोयल्सले काठमान्डौ गोर्खाजलाई १२६ रनको लक्ष्य दिएको थियो । जवाफमा काठमाण्डौले २० ओभरमा ७ विकेट गुमाएर ११८ रन मात्र बनाउन सक्यो ।

अर्को खेलमा जनकपुर बोल्ट्सले २० ओभरमा ९ विकेट गुमाएर ८८ रन मात्र बनायो । ८९ रनको सामान्य लक्ष्य पछ्याएको चितवन राइनोजका लागि पनि जीत सहज भएन । जनकपुरबाट खेलिरहेका न्युजिल्यान्डका अलराउन्डर जिमी नीशमले पिच सुधार गर्नुपर्ने सामाजिक सञ्जालमार्फत् बताएका छन् ।

त्यस्तै चितवनका ब्याटर डेविड मालनले टी–२० क्रिकेट विश्वभर नै मनोरञ्जनको माध्यम बनेको र त्यसका लागि रन बन्नुपर्ने बताएका छन् । जनकपुरसँग झिनो लक्ष्य पूरा गर्न कठिन भएपछि मालनले रन नबन्दा मनोरञ्जन नहुने बताएका हुन् ।

त्यस्तै काठमाण्डौलाई ७ रनले हराएपछि सुदूरपश्चिमका बलर हेमन्त धामीले बल घुमिरहेको र त्यसले बलरलाई फाइदा पुगिरहेको प्रतिक्रिया दिएका छन् ।

यसअघि तेस्रो संस्करणको प्लेअफ पुगेपछि लुम्बिनी लायन्सका कन्स्ल्टेन्ट तथा प्रशिक्षक शक्ति गौचनले पनि पिच कठिन हुँदा सामान्य लक्ष्य भए पनि ब्याटिङमा संघर्ष गर्नुपरेको बताएका थिए ।

कर्णाली याक्सलाई हराउँदै प्लेअफमा पुगेपछि भएको पत्रकार सम्मेलनमा गौचनले पिच केही ट्रिकी रहँदा ब्याटिङका लागि कठिन भएको बताएका हुन् ।