नेभिगेशन
शनिबार, मंसिर ५, २०८३

राजनीतिक अशान्तिकाबीच बङ्गलादेशमा आगजनीका घटना

राजनीतिक अशान्तिकाबीच बङ्गलादेशमा आगजनीका घटना भएका छन् । प्रहरीले राजधानी ढाकामा अवामी लिगसँग सम्बन्धित १२४ जनाभन्दा धेरैलाई पक्राउ गरेको छ । तर यससम्बन्धी थप विवरण सार्वजनिक गरिएको छैन ।

अस्ति बिहीबार अन्तरिम सरकारका पूर्व प्रमुख मोहम्मद युनुसको चट्टग्राममा रहेको पैतृक घरमा प्रदर्शनकारीले आगजनी गरेका थिए । त्यस्तै बुधबार नडाइलमा प्रदर्शनबाट फर्कदै गरेका बङ्गलादेश नेसनलिस्ट पार्टी (बीएनपी)का दुई नेताको हत्या भएको थियो ।

मंगलबार रातिदेखि विभिन्न ठाउँमा तोडफोड, आगजनी र घरेलु बम विस्फोटका घटना हुँदै आएका छन् । यो आक्रमणमा प्रतिबन्धित अवामी लिगका कार्यकर्ता संलग्न रहेको प्रहरीको दाबी छ । बङ्गलादेशका प्रधानमन्त्री तारिक रहमानले पूर्वप्रधानमन्त्री शेख हसिना नेतृत्वको अवामी लिगले देशलाई अस्थिर बनाउन षड्यन्त्र रचिरहेको आरोप लगाउनुभएको सरकारी समाचार संस्था बीएसएसले जनाएको छ।

ढाकामा रहेको उच्च अदालतले आउँदो डिसेम्बर ३१ तारिखसम्मका लागि देशभरका सम्पूर्ण सार्वजनिक विश्वविद्यालयको प्रवेश परीक्षा स्थगित गर्न आदेश दिएको छ । सन् २०२४ अगस्ट ५ मा विद्यार्थी आन्दोलनको बलमा ७९ वर्षीया शेख हसिनाको सत्ता ढलेपछि उहाँले भारतमा शरण लिँदै आउनुभएको छ ।

उहाँ स्वदेश फर्कन राहदानी माग गरे पनि सरकारले त्यसलाई अस्वीकार गरेपछि अवामी लिगले हड्ताल घोषणा गरेको थियो । पूर्वप्रधानमन्त्री हसिनाको स्वदेश फर्किने घोषणापछि राजनीतिक तनाव थप चुलिएको हो । बढ्दो हिंसा नियन्त्रण गर्न सरकारले संवेदनशील क्षेत्रमा सुरक्षा व्यवस्था कडा पारेको छ ।
 

प्रकाशित मिति:
थप विश्व