नेकपा माओवादी केन्द्रका सचिव देवेन्द्र पौडेलको जन्म २०२१ साल पुष २८ गते बाग्लुङको अमलाचौर १ मा भएको हो । दाजुहरुको प्रेरणाबाट कम्युनिष्ट आन्दोलनमा लागेका पौडेलले शिक्षाशास्त्र संकाय तर्फबाट स्नातक गर्नुभएको छ ।
यस्तै पौडेलले राजनीतिशास्त्रमा स्नातकोत्तर गर्नुभएको छ । २०३४ सालमा नै विद्यार्थी संगठनमा आबद्ध भएका पौडेल २०४१ सालमा अखिल छैटौंका बाग्लुङ जिल्ला अध्यक्ष हुनुभयो । त्यसपछि त्यस संगठनको उहाँ केन्द्रीय कोषाध्यक्ष, महासचिव र उपाध्यक्ष समेत हुनुभयो ।
मोहनविक्रम सिंह नेतृत्वको तत्कालीन नेकपा (मसाल) बाट हरिबोल गजुरेल, डा. बाबुराम भट्टराई, बिनबहादुर कुँवर, टोपबहादुर रायमाझीसँगै उहाँ पनि अलग भएर विद्रोही मसाल बन्यो । त्यसपछि एकता केन्द्र हुँदै नेकपा माओवादीमा संगठित हुनुभयो ।
२०३७ सालमा तत्कालीन नेकपा चौम (चौथो महाधिवेशन) को सदस्यता लिएका पौडेल ०३९ सालमा पार्टीको पूर्णकालीन सदस्य हुनुभयो भने ०५७ सालमा तत्कालीन नेकपा माओवादीको केन्द्रीय सदस्य बन्नुभयो । २०७२ सालमा माओवादी छाडेर बाबुराम भट्टराइको नयाँ शक्तिमा पुगेका पौडेल फेरि माओवादीमै फर्केर स्थायी समिति सदस्य हुनुभएको थियो । छ ।
पौडेल २०६४ सालमा भएको संविधानसभा चुनावमा काठमाण्डौ क्षेत्र नम्वर ९ मा पराजित हुनु भएको थियो । २०७४ सालको चुनावमा भने बाग्लुङ क्षेत्र नम्बर २ बाट विजयी हुनुभयो ।