नेपाली कांग्रेसका केन्द्रीय सदस्य देवेन्द्र राज कण्डेलको जन्म नवलपरासीको रमपुरवा गाविस वडा नम्बर ६ मा २०१३ साल चैत ६ गते भएको हो । बुवा पृथ्वीराज र आमा धनदेवी कण्डेलबाट जन्मेका देवेन्द्रराज कण्डेलका एक छोरा र एक छोरी छन् ।
परिवार नै राजनीतिमा भएकाले उहाँ सुरुदेखि नै राजनीतिक संस्कारमा हुर्कनुभयो । उहाँकी हजुरआमा राधादेवी कण्डेल २०१५ सालमा नेपाली कांग्रेस संसदीय समितिको सदस्य हुनुहुन्थ्यो । बुवा पृथ्वीराज पनि २०१५ सालमा निर्वाचित सांसद हुनुहुन्थ्यो ।
पारिवारिक वातावरणकै कारण उहाँ राजनीतिमा सक्रिय हुन थाल्नुभयो । २०३८ सालमा उहाँ पहिलोपटक प्रधानपञ्च निर्वाचित हुनुभएको थियो । पार्टीलाई सहयोग गर्ने हिसाबले उहाँ दुईपटक प्रधानपञ्च बन्नुभयो ।
बहुदलपछि उहाँ २०५१ र २०५६ सालमा भएको चुनावमा नवलपरासी क्षेत्र नम्बर ४ बाट निर्वाचित हुनुभएको थियो । तर, २०६४ र २०७० सालको चुनावमा उहाँ पराजित हुनुभएको थियो । २०७४ सालको संसदीय चुनावमा भने उहाँ नवलपरासी पश्चिम क्षेत्र नम्बर २ बाट विजयी हुनुभयो ।
उहाँ २०५४ र २०५६ मा गरी दुईपटक गृह राज्यमन्त्री हुनुभयो । उहाँ गृह राज्यमन्त्री हुँदा तत्कालीन नेकपा माओवादीका नेताहरुको टाउकाको मोल तोकेका कारण नेकपा माओवादीका कार्यकर्ताले उहाँलाई २०६० भदौमा ललितपुरको कुसुन्तीमा गोली प्रहार गरेका थिए । १७ राउण्ड प्रहार गरिएका गोलीमध्ये ७ राउण्ड उहाँलाई लागेको थियो भने अझै पनि एउटा गोली छातीबाट निकालिएको छैन ।
