कर्णाली प्रदेशका पूर्व मुख्यमन्त्री महेन्द्र बहादुर शाहीको जन्म वि.स. २०३३ सालमा भएको हो । कालिकोटका शाही साविकको कोटिला गाउँका स्थायीबासी हुनुहुन्छ । माओवादी केन्द्रभित्र इमान्दार नेताको छवि बनाउनुभएका शाही २०७० को संविधानसभा चुनावमा कालिकोट क्षेत्रनम्बर १ बाट विजयी हुनुभएको थियो । यस्तै २०७४ को प्रदेश सभा चुनावमा कालीकोट क्षेत्र नम्बर खबाट विजयी हुँदै उहाँ कर्णाली प्रदेशको मुख्य मन्त्री बन्नुभयो ।
माओवादीका जनमुक्ति सेना नेपालका सातौँ डिभिजन कमाण्डर रहनुभएका शाहीले कालीकोटमा माओवादी विस्तारको ठूलो योगदान रहेको छ । माओवादीमा ‘प्रज्वल’ उपनामले चिनिने शाहीले माओवादी लडाइका ठूला मोर्चाहरुमा निर्णायक भूमिका निर्वाह गर्नुभएको थियो । २०४८ सालमा नेकपा मसाल एकता केन्द्रबाट राजनीतिक यात्रा शुरु गर्नुभएका शाही २०५२ सालको माओवादी जनयुद्धको सुरुदेखि भूमिगत हुनुभयो । शाहीले एसएलसीसम्मको पढाइ गर्नुभएको छ । भूमिगत अवस्थामा पनि राजनीतिक र फौजी दुवै मोर्चामा सैन्य नेतृत्व सम्हाल्दै अघि बढ्नुभयो ।
