माओवादी केन्द्रका उपमहासचिव शक्तिबहादुर बस्नेत केपी शर्मा ओली नेतृत्वको सरकारमा गृहमन्त्री तथा त्यसअघि स्वास्थ्य मन्त्री हुनुहुन्थ्यो ।
मानविकीमा स्नातक शक्तिबहादुर बस्नेतको जन्म २०२८ साल वैशाख १ गते जाजरकोटको खलंगामा भएको हो । उहाँका बुबाको नाम डण्डवीर बस्नेत र आमाको नाम धर्मकुमारी बस्नेत हो ।
बस्नेतले विद्यार्थी हुँदै राजनीति सुरु गर्नुभएको हो । वि.सं. २०४७ सालदेखि राजनीति थालेका बस्नेत २०५५ सालमा नेकपा माओवादीको केन्द्रीय सदस्य हुनुभयो । २०६० सालमा पोलिटब्यूरो सदस्य हुँदै बस्नेत सशस्त्र विद्रोहकालमा माओवादी लडाकुको डिभिजन कमिसार समेत हुनुभयो ।
सशस्त्र विद्रोहकालमा उहाँले जाजरकोट, सुर्खेत, दाङ, बर्दिया, डोल्पा, जुम्ला, बाँके, प्यूठान, दैलेख जिल्लामा काम गर्नुभएको थियो ।
पार्टीमा सरल स्वभावका चलाख नेताका रुपमा चिनिने बस्नेत २०७० सालको चुनावमा जाजरकोट क्षेत्र नं १ बाट निर्वाचित हुनुभएको थियो । २०७४ सालको चुनावमा पनि उहाँ यसै क्षेत्रबाट विजयी हुनु भएको हो ।
