नेकपा माओवादी केन्द्रका उपमहासचिव जनार्दन शर्मा ‘प्रभाकर’ अहिले अर्थमन्त्री हुनुहुन्छ । बजेट तयार गर्दा अनधिकृत व्यक्ति प्रवेश गराइ करको दर हेरफेर गरेको आरोप लागेपछि राजीनामा दिनुभएका शर्मा आरोप पुष्टि हुन नसकेपछि फेरि अर्थमन्त्रीमा नियुक्त हुनुभयो । शर्मा गृहमन्त्री, विना विभागीयमन्त्री साथै शान्ति तथा पुनर्निर्माण मन्त्री पनि हुनुभयो ।
उहाँको जन्म २०२० साल बैशाख १२ गते रुकुम जिल्लामा भएको हो । स्कन्द शर्मा र नर्मदा शर्माका छोरा जनार्दन शर्माका एक छोरी र एक छोरा छन् । उहाँका बुवा रुकुममा कम्युनिष्ट पार्टीको संस्थापक जिल्ला कमिटी सदस्य हुनुहुन्थ्यो ।
शर्मा २०६४ तथा २०७० सालको संविधानसभा चुनावमा रुकुम जिल्लाको क्षेत्र नम्बर २ बाट विजयी हुनुभएको थियो । २०७४ सालको चुनावमा भने उहाँ रुकुम क्षेत्र नम्बर १ बाट विजयी हुनु भएको हो । अहिले उहाँ रुकुम पश्चिमबाट उम्मेदवारी दिनु भएको छ ।
राजनीतिशास्त्र र नेपालीमा स्नातक शर्मा २०३६ सालको विद्यार्थी आन्दोलनमार्फत राजनीतिमा सक्रिय हुनुभएको हो । जनमुक्ति सेना नेपालका चारजना डेपुटी कमाण्डरमध्ये एक शर्मा प्लाटुन, बटालियन कमिसार हुँदै डिभिजन कमाण्डर ७ वटा डिभिजन भएपछि डेपुटी कमाण्डर हुनुभएको थियो ।
उहाँकी श्रीमती लक्ष्मी पौडेल पनि माओवादीको राज्यसमितिको सदस्य हुनुहुन्थ्यो । नाच्न गाउन खप्पिस शर्मा २०४६ सालमा नाचगान गरेकै आरोपमा शान्ति सुरक्षा ऐन अन्तर्गत जेलमा थुनिनु भएको थियो । शर्मा २०५५ सालमा तत्कालीन नेकपा माओवादीको केन्द्रीय सदस्य बन्नुभएको हो ।
प्रचण्ड प्रधानमन्त्री हुँदा उर्जामन्त्री भएका शर्मा देशमा लोडसेडिङ हटाएर लोकप्रिय बन्नु भएको थियो ।
