काठमाण्डाै – एनसेल र महिला उद्यमी महासङ्घ नेपालले देशव्यापीरूपमा महिला उद्यमीकाे क्षमता अभिवृद्धि गर्न हातेमालो गर्ने प्रतिबद्धता जनाउँदै सहकार्यको थालनी गरेका छन् । यो सहकार्यले महिला सशक्तीकरण र नेपालको सामाजिक-आर्थिक विकासमा योगदान पुर्‍याउने उद्देश्य राखेको छ ।

सातौँ अन्तर्राष्ट्रिय महिला उद्यमी व्यापार मेला २०८० को अवसरमा एनसेल र महिला उद्यमी महासङ्घले महिला उद्यमीकाे विकास, दिगो व्यापार वृद्धिका लागि सहजीकरण र जीविकोपार्जनमा सहयोग पुर्‍याउन एक समझदारी पत्रमा हस्ताक्षर गरेका छन् ।

चैत १६ गते ललितपुरको हेरिटेज गार्डेनमा आयोजित सातौँ अन्तर्राष्ट्रिय महिला उद्यमी व्यापार मेलाको उद्घाटन समारोहमा महिला उद्यमी महासङ्घ नेपालकी अध्यक्ष शोभा ज्ञवाली र एनसेलकी कर्पोरेट कम्युनिकेसन तथा सीएसआर हेड विशाखा लक्ष्मी खड्काले समझदारीपत्र आदानप्रदान गरेका थिए ।

एनसेलले महिला उद्यमी महासङ्घसँग आबद्ध पाँच हजार जनाभन्दा बढी महिला उद्यमीकाे क्षमता अभिवृद्धि र डिजिटल साक्षरताका लागि सहयोग गर्ने उद्देश्य राखेको छ ।