सल्यान – नेपाल पत्रकार महासंघका केन्द्रीय उपाध्यक्ष विपुल पोखरेलले पत्रकारलाई ढुक्कसँग भएर कलम चलाउन आग्रह गर्नुभएको छ । 

पछिल्लो समय सरकारले नियम कानुन मिचेरे पत्रकारलाई गिरफ्तार गर्न थालेको भन्दै उहाँले आपत्ति जनाउनु भएको छ  । 

नेपाल पत्रकार महासंघ सल्यान शाखाले शुक्रबार सदरमुकाम खलंगामा आयोजनामा गरेको पत्रकार सुरक्षा र आचारसंहिता पालनाको अवस्था विषयक अन्तक्रिया कार्यक्रममा बोल्दै उपाध्यक्ष पोखरेले एक पत्रकार असुरक्षित हुँदा आम नागरिक सूचनाको पहुँचबाट विमुख हुने बताउनुभयो ।

आम नागरिक सूचनाबाट विमुख हुने कार्य राज्य पक्ष र स्वयम पत्रकारले गर्न नहुनेमा उहाँले जोड दिनुभयो । ‘पछिल्लो समय राज्यबाट पत्रकार र पत्रकारिता सुरक्षित हुन नसकिरहेको समयमा पत्रकार स्वयमले आचारसहिंतालाई पालना गर्नुु पदर्छ’, उहाँले भन्नुभयो ।

पत्रकार र पत्रकारिताको सुरक्षा गर्ने राज्यको दायित्व भए पनि समाचार प्रकाशन प्रसारण भएकै कारण प्रेसमाथि हस्तक्षेप भइरहेका भन्दै उहाँले यसप्रति पत्रकार महासंघको आपत्ति रहेको बताउनुभयो । 

हाल सरकारले ल्याएको फौजदारी सहिंता आम पत्रकारको हितमा नरहेको बताउँदै उहाँले सरकारलाई खबरदारी गर्दै आइरहेको र यदि सरकारले त्यस विषयमा पुनर्विचार नगरेमा सडकमै भए पनि आउनु पर्नेमा उहाँको जोड थियो । ‘राज्यले पत्रकारिताई कुण्ठित पार्ने गरी जुन सहिंता ल्याइएको छ त्यो पत्रकारको हितमा छैन त्यसैले यसलाई परिवर्तन गर्नु पर्छ’, उहाँले भन्नुभयो । 

समाचार सत्य र गलत भनेर छुट्याउने निकाय प्रेस काउन्सिल हुँदाहुँदै सरकारले पत्रकारिता आचार संहिताविरुद्ध लागेको उहाँले बताउनुभयो ।

उहाँले भन्नुभयो, ‘समाचार सत्य लेख्नुपर्छ, त्योे हरेक पत्रकारको धर्म र कर्तव्य हो तर झुटो भएमा खबरदारी गर्ने काम प्रेस काउन्सिलको हो ।’ पत्रकारलाई कारबाही र मुद्दा लगाउने अधिकार अरु कसैको नभएको उहाँले बताउनुभएको छ । 

कार्यक्रममा बोल्दै महासंघ दाङ शाखाका निवर्तमान अध्यक्ष सुदिप गौतमले पछिल्लो समयमा पत्रकार राज्यबाट असुरक्षित भएको भन्दै डराउन आवश्यक नभएको बताउनु भएको छ । 

कार्यक्रममा प्रमुख जिल्ला अधिकारी कमलराज ढकालले पत्रकारले सत्य र निष्पक्ष तरिकाले कलम चलाउनु पर्ने बताउनुभएको छ । पत्रकारलाई चौतर्फीबाट हेरिने भएकाले पत्रकारले जे सूचना दियो त्यही जनमानसमा जाने भन्दै उहाँले आचारसंहिताको पालन पत्रकारले गर्नुपर्न बताउनुभयो । उहाँले सरकार पनि नीति नियममा जानुपर्ने बताउनुभयो।

सल्यानका प्रहरी प्रमुख डीएसपी वीरेन्द्रबहादुर शाहीले पत्रकारले आप्mनो पेशामा आँच आउने खालको कुनै पनि काम गर्न नहुने बताउनुभयो । सल्यानमा पत्रकारलाई राज्यबाट कुनै सुरक्षा चुनौती नभएको भन्दै उहाँले केन्द्रको बारेमा आफू बोल्न नमिल्ने बताउनुभयो ।