दक्षिण एसियाली खेलकुदमा आज २० स्वर्ण पदकका लागि प्रतिस्पर्धा

 मंसिर १७, २०७६ मंगलबार ८:२०:२९ | उज्यालो सहकर्मी
unn.prixa.net

दक्षिण एसियाली खेलकुद अन्तर्गत मंगलबार २० स्वर्ण पदकका लागि प्रतिस्पर्धा हुँदैछ ।

मंगलबारदेखि भलिबल खेल सम्पन्न हुनेछ । दुईवटा स्वर्णका लागि फाइनल खेल हुँदैछ । पुरुषतर्फको उपाधिका लागि भारत र पाकिस्तान आमने सामने हुँदैछन् भने महिलातर्फ नेपाल र भारत प्रतिस्पर्धा गर्दैछन् ।

पुरुषतर्फको सेमिफाइनलमा भारतले श्रीलंकालाई हराउँदै फाइनलमा पुगेको थियो । त्यस्तै पाकिस्तानले बंगलादेशलाई पराजित गर्दै फाइनलमा स्थान बनाएको थियो ।

महिलातर्फको उपाधिका लागि नेपाल र भारत प्रतिस्पर्धा गर्नेछन् । समूह चरणको खेलमा भारतसँग ३–० को सोझो सेटमा पराजित भएको नेपाल त्यसको बदला लिँदै स्वर्ण जित्ने लक्ष्यमा हुनेछ । महिला भलिबलतर्फको फाइनल दिउँसो चार बजे हुनेछ । 

मंगलबारदेखि एथलेटिक्सका खेलहरु पनि संचालन हुनेछन् । एथलेटिक्समा १,५०० मिटर पुरुष र महिला, सटपुट पुरुष र महिलाको खेल संचालन हुनेछ । एथलेटिक्समा एक सय र चार सय मिटर दौड तथा हर्डल्सका हिट पनि संचालन हुनेछन् ।

यस्तै कराँतेमा ६ वटा स्वर्णको छिनोफानो हुनेछ । पुरुषको ६० केजी मुनि, ६७ केजी मुनी र ७५ केजी मुनिको प्रतिस्पर्धा हुनेछ भने महिला तर्फ ५५ केजी मुनि, ६१ केजी मुनी र ६८ केजी मुनिमा खेल संचालन हुनेछ ।

यस्तै उसुमा महिला र पुरुषको चाङक्वान गरी दुई स्वर्णको टुंगो लाग्नेछ ।

टेबल टेनिसमा पनि पुरुष र महिलाको टिम इभेन्टका खेलहरु सम्पन्न हुनेछन् । ट्रायाथलनमा मिक्सड रिलेको फाइनल हुनेछ ।

फुटबलमा नेपालले भुटानसँग प्रतिस्पर्धा गर्दैछ । नेपाल र भुटानबीचको खेल दशरथ रंगशालामा दिउँसो एक बजे हुनेछ भने बंगलादेश र माल्दिभ्सबीचको खेल साँझ पाँच बजे सुरु हुनेछ ।

महिला फुटबलमा नेपाल र श्रीलंका तथा भारत र माल्दिभ्स खेल्दैछन् ।

मंगलबारदेखि पुरुष क्रिकेट सुरु हुँदैछ । पुरुष क्रिकेटमा नेपाल र श्रीलंकाको यू–२३ टिमबीच प्रतिस्पर्धा हुनेछ । पोखरामा हुने महिला क्रिकेटमा भने श्रीलंका र बंगलादेश खेल्नेछन् ।

मंगलबारदेखि सातदोबाटोको सुटिङ रेन्जमा सुटिङका प्रतिस्पर्धा हुँदैछन् । सुटिङमा महिलाको १० मिटर एयर राइफल तथा महिला र पुरुषको थ्री पोजिसन राइफलका खेलहरु सम्पन्न हुनेछन् ।

लन टेनिसमा टिम इभेन्टका सेमिफाइनलका खेलहरु संचालन हुनेछन् । यस्तै, गल्फ पनि मंगलबारदेखि नै सुरु हुनेछ । कीर्तिपुरमा जारी खोखोमा मंगलबार सेमिफाइनलका खेलहरु संचालन हुनेछन् ।

अन्तिम अपडेट: बैशाख १५, २०८१

उज्यालोका खबर फेसबुक, इन्स्टाग्राम, एक्स ट्वीटरयूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया