दक्षिण अफ्रिकासँगको तीन ट्वेण्टी ट्वेण्टी क्रिकेट इंग्ल्याण्डले जितेको छ । तेस्रो तथा अन्तिम खेलमा दक्षिण अफ्रिकालाई ५ विकेटले हराउँदै इंग्ल्याण्डले सिरिज २–१ ले जितेको हो । २ सय २३ रनको लक्ष्य इंग्ल्याण्डले १९ ओभर १ बलमा ५ विकेट गुमाएर पूरा गर्यो ।

इंग्ल्याण्डको जितमा कप्तान इयान मोर्गनले नटआउट ५७ रन बनाए । उनले २१ बलमा अर्धशतक बनाउँदै कम बलमा अर्धशतक पूरा गर्ने कीर्तिमानको बराबरी गरे । यस्तै जोनी बेयरस्ट्रोले ६४ र जोस बटलरले ५७ रन बनाए ।

दक्षिण अफ्रिकाका लुंगी नेग्दीले २ विकेट लिए । सेञ्चुरियनमा पहिले ब्याटिङ गरेको घरेलु टोली दक्षिण अफ्रिकाले २० ओभरमा ६ विकेट गुमाएर २ सय २२ रन बनाएको थियो । दक्षिण अफ्रिकाका हेन्रिच क्लासेनले ६६ र टेम्बा बाभुमाले ४९ रन बनाए ।

यस्तै, क्विनटन डी कक र डेभिड मिल्लरले समान ३५/३५ रन बनाए । इंग्ल्याण्डका टम करन र बेन स्टोक्सले २, २ विकेट लिए ।