पर्सा - पर्सामा चार जना मिर्गौलाका बिरामी कोरोना सङ्क्रमणमुक्त भएर अस्पतालबाट घर फर्किएका छन् । 

मिर्गौला फेल (इन्ड स्टेज रिनल डिजीज) भई हेमो-डायलाइसिस गराइरहेका ४ जना दीर्घरोगी कोरोना  जितेर अस्पतालको आईसीयूबाट घर फर्किएका हुन् ।

बारा जीतपुर सिमरा उप-महानगरपालिकाकी ३० वर्षीया  सपना श्रेष्ठ, निजगढ नगरपालिकाका ५६ वर्षीय नरबहादुर विक पर्सा पोखिरीयाकी ६५ वर्षीया कोशीला देवी र  वीरगञ्ज महानगरपालिका वडा नं १० घरिअर्वाकी ३५ वर्षीया तारा शर्मा कोरोना जितेर घर फर्किनु भएको हो । 

‘उनीहरुको उपचारमा विशेष खालकाे चिन्ता थियो’  नारायणी अस्पतालका डायलाइसिस इन्चार्ज डा.निरज सिंहले भन्नुभयो ‘हाई रिस्क ग्रुपमा पाइएको सफलताले स्वास्थ्यकर्मीहरुको मनोबल उच्च भएको छ ’।

विक र श्रेष्ठ साेमबार वीरगञ्ज हेल्थ केयर कोभिड अस्पतालबाट डिस्चार्ज हुनु भएको हो । कोशीला र तारा भने हिजो डिस्चार्ज हुनु भएको हो ।  झन्डै १४ दिनको अस्पताल बसाइपछि गरिएको परीक्षणमा उनीहरुको पीसीआर रिपोर्ट नेगेटिभ आएको हो ।

उनीहरुमा ३ घण्टाको डायलाइसिसको सेशन ४ पटक गरिएको डा‍‍.सिंहले बताउनु भयो । ‘उहाँहरु त संक्रमित नै हुनु भयो । हाम्रो पनि ज्यान जोखिममा थियो’ डा सिंहले भन्नुभयो ‘दीर्घरोगीहरुमा रोग प्रतिरोधात्मक क्षमता कम हुन्छ । उहाँहरुलाई घर फर्काउन सकिएकाेमा खुसी मिलेको छ ’ ।

मिर्गौला फेल भएर डायलाइसिसको सेवा लिइरहेका बिरामीहरुले कोरोनालाई जितेर घर फर्किएको यो घटनाले सकारात्मक सन्देश प्रवाह गरेको छ ।