स्याङ्जा – स्याङ्जाकी एक महिलालाई सामाजिक सञ्जाल फेसबुकमार्फत दश लाखभन्दा धेरै ठगी गरेको आरोपमा बाजुराका एक युवा पक्राउ परेका छन् । 

प्रहरीले बाजुराको हिमाली गाँउपालिका ४ का २७ वर्षीय रुपचन्द्र पाण्डेलाई बाँकेको नेपालगञ्जबाट पक्राउ गरेको हो । 

पाण्डेले स्याङ्जाकी एक महिलालाई आफू ब्राजिलमा रहेको र परिवारका सदस्य गम्भीर बिरामी भएकाे भन्दै विश्वास दिलाइ १० लाख २८ हजार सात सय रुपैयाँ ठगी गरेको स्याङ्जाका प्रहरी प्रवक्ता राजेन्द्रप्रसाद अधिकारीले जानकारी दिनुभयो । 

पक्राउ परेका पाण्डेलाई जिल्ला अदालत स्याङ्जाबाट म्याद थप गराइ अनुसन्धान सुरु गरिएको प्रवक्ता अधिकारीले बताउनुभयो । पाण्डेविरुद्ध आपराधिक विश्वासघात तथा आपराधिक लाभसम्बन्धी मुद्धा दर्ता गरिएको प्रहरीले जनाएको छ ।