काठमाण्डाै – अस्ट्रेलिया सरकारले थप गरिएको लकडाउन कार्यान्वयनका लागि सयौँको सङ्ख्यामा सेना परिचालन गरेको छ । 

गएको जुन महिनामा फैलिन सुरु भएको डेल्टा भेरियन्टबाट झन्डै तीन हजार जना सङ्क्रमित भएका छन् भने नौ जनाको ज्यान गएको छ । 

तर लकडाउन कार्यान्वयन गराउनका लागि सैन्य हस्तक्षेपबारे प्रश्न उठेको छ । धेरै मानिसलाई त्यसलाई आवश्यक मानेका छैनन् ।

कम्तीमा अगस्ट २८ तारिखसम्म लगाइने लकडाउनमा मानिसहरू आवश्यक व्यायाम, किनमेल, हेरचाहका लागि वा अन्य कारणबाहेक घरबाट निस्कन पाउने छैनन् । 

अस्ट्रेलियन डिफेन्स फोर्सका सैनिक प्रहरीसँगै धेरै सङ्क्रमण फैलिएका ठाउँमा लकडाउनसम्बन्धी नियम पालना भए वा नभएको हेर्न खटिनेछन् । यस्तै लकडाउनमा दश किलोमिटरभन्दा बढी यात्रा गर्न प्रतिबन्ध लगाइएको छ । 

शुक्रवार थप एक सय ७० जना कोरोनाका सङ्क्रमित थपिएका छन् ।