स्याङ्जा – आउँदाे मङ्सिर ४ गते हुने चुनावका लागि स्याङ्जा १ (क) मा गठबन्धनका उम्मेदवारविरुद्ध बागी उम्मेदवारी दिनुभएका नेपाली कांग्रेसका मेखलाल श्रेष्ठले उम्मेदवारी फिर्ता लिनुभएको छ । 

यस प्रदेश सभामा गठबन्धनका तर्फबाट नेकपा माओवादी केन्द्रकी अमृता थापा मगर उम्मेदवार बन्नुभएकाे थियाे । लामो छलफल र सहमतिपछि आफूले उम्मेदवारी फिर्ता लिएकाे श्रेष्ठले सामाजिक सञ्जाल फेसबुकमार्फत जानकारी गराउनुभएको छ । उहाँलाई पार्टी सभापित शेरबहादुर देउवाले उम्मेदवारी फिर्ता लिनका लागि पत्र पठाउनुभएकाे निर्वाचन अधिकृतको कार्यालयले जनाएकाे छ ।  

यस्तै वालिङ २ (क) मा गठबन्धनका उम्मेदवारविरुद्ध उम्मेदवारी दिनुभएका कांग्रेसका भाेजराज अर्यालकाे उम्मेदवारी कायमै छ । यस प्रदेशमा गठबन्धनका तर्फबाट नेकपा एकीकृत समाजवादीका रामचन्द्र भट्टराई उम्मेदवार बन्नुभएकाे थियाे ।  

स्याङ्जा क्षेत्र नम्बर १ मा प्रतिनिधि सभा सदस्यका लागि कांग्रेसबाट बागी उम्मेदवारी दिनुभएका गोविन्दबहादुर रानाभाट र एकीकृत समाजवादीका विष्णु गिरीले पनि उम्मेदवारी फिर्ता लिनुभएको छ । यस्तै स्वतन्त्ररूपमा उम्मेदवारी दिनुभएका अर्जुन पौडेल र मनोज नेपालीले पनि उम्मेदवारी फिर्ता लिनुभएकाे छ । 
यस्तै समाजवादीका तर्फबाट स्याङ्जा १ (ख) मा उम्मेदवार दिनुभएकी शर्मिला देवी पौडेलले पनि उम्मेदवारी फिर्ता लिनुभएको छ । 

स्याङ्जा क्षेत्र नम्बर २ मा प्रतिनिधि सभा सदस्यका लागि नेकपा एमालेबाट बागी उम्मेदवारी दिनुभएका कपिलदेव न्यौपानेले पनि उम्मेदवारी फिर्ता लिनुभएकाे छ । यस क्षेत्रबाट एमालेले पद्मा अर्याललाई टिकट दिएकाे छ ।