सोलुखुम्बु - खुम्बु क्षेत्रको १० थान मतपेटिका हेलिकप्टरमार्फत् सल्लेरी ल्याइएको छ । 

खुम्बु पासाङ ल्हामु गाउँपालिका-५ नाम्चेमा सङ्कलन गरिएको मतपेटिकामध्ये पहिलो पटकमा नेपाली सेनाको हेलिकप्टरबाट १० थान मतपेटिका फाप्लु झारिएको जिल्ला प्रहरी कार्यालयका प्रहरी नायब उपरीक्षक सुनिलजङ्ग शाहले जानकारी दिनुभयाे । उहाँका अनुसार हेलिकप्टरमा प्रति पटक १० थान मात्रै मतपेटिका अट्ने भएकाले चार वटा उडान गरिने भएको छ ।

११ वटा मतदान केन्द्र रहेको खुम्बुमा खरिखोलाको २ वटा केन्द्रको मतपेटिका गाडीमार्फत् सल्लेरी ल्याइएको छ भने ९ वटा केन्द्रको ३६ वटा मतपेटिका हेलिकप्टरबाट ल्याइँदैछ ।

 माथिल्लो भेगको मतपेटिका लुक्ला र नाम्चेमा सङ्कलन गरी हेलिकप्टरमार्फत् ल्याइने भएको हो । हिजो भएको प्रतिनिधि सभा र प्रदेश सभा चुनावमा खुम्बु पासाङ ल्हामु गाउँपालिकामा ५ हजार ९ सय ८७ मतदातामध्ये २ हजार ६ सय ४७  मत खसेको छ ।