धनुषा – मधेस प्रदेशका नवनिर्वाचित प्रदेश सभा सदस्यले यही पुस १५ गते पद तथा गोपनीयताको शपथ लिने भएका छन् । प्रदेश सभामा आज साेमवार बसेको सर्वदलीय बैठकले पुस १५ गते दिउँसाे २ बजे शपथ ग्रहणका लागि समय निर्धारण गरिएको प्रदेश सभा सचिवालयका सचिव रंजित कुमार यादवले जानकारी दिनुभयाे । 

नेपालको संविधानको धारा १७९ बमोजिम प्रदेश सभा सदस्यले प्रदेश सभा वा त्यसको कुनै समितिको बैठकमा पहिलो पटक भाग लिनुअघि प्रदेश कानुन बमोजिम शपथ लिनुपर्ने व्यवस्था छ ।

नेपालको संविधानको धारा १८२ को उपधारा (५), प्रदेश सभा सदस्य निर्वाचन ऐन, २०७४ को दफा ७५ बमोजिम प्रदेश सभाको अध्यक्षता गर्ने ज्येष्ठ सदस्य गोविन्दबहादुर न्यौपानेले अरू सदस्यलाई शपथ ग्रहण गराउने प्रदेश सभा सचिवालयले जनाएको छ ।

प्रदेश सभा सदस्यलाई शपथ ग्रहणका लागि दुई घण्टाअघि नै राष्ट्रिय पोसाक वा आ–आफ्नो सांस्कृतिक पहिचान झल्कने पोसाकमा उपस्थिति हुन सचिवालयले अनुरोध गरेको छ । यस्तै आफ्नो मातृभाषामा शपथ लिन चाहने सदस्यले तीन दिनअघि नै प्रदेश सभा सचिवालयमा जानकारी गराउनुपर्ने छ ।