कास्की - पोखरेलीहरुले सडकबाटै अङ्ग्रेजी नयाँ २०२३ को स्वागत तथा २०२२ को बिदाइ गरेका छन् ।

अङ्ग्रेजी नयाँ वर्षको अवसरमा रेवान पोखराले आयोजना गरेको २४औँ पोखरा सडक महोत्सवको रमाइलोसँगै अङ्ग्रेजी नयाँ वर्षको स्वागत गर्न शनिवार हजारौँ पोखरेलीहरु लेकसाइड पुगेका थिए । उनीहरुले मध्यरातमा सडकबाटै एक आपसमा शुभकामना आदानप्रदान गर्दै नयाँ वर्षको स्वागत गरे ।

राति १२ बज्नै लाग्दा पटक पट्काउँदा सडकमा रहेका हजारौँ पाेखरेली उत्साही भएका थिए । रेवान पोखराले सडकमै खाऔँ, सडकमै नाचौँ, सडकमै रमाऔँ भन्ने नाराका साथ सडक महोत्सव आयोजना गर्दै आएको छ । सडक महोत्सवमा रमाउन आन्तरिक, भारत र बङ्लादेशबाट सयाैँ पर्यटक आएका  रेवान पोखराका अध्यक्ष नरेश भट्टराईले बताउनु भयाे । 

नयाँ वर्षको स्वागत गर्न जम्मा भएका विदेशी तथा स्वदेशी पर्यटकले लेकसाइडको बाटो खचाखच भएकाे थियो । उनीहरु सबैले पीडा भुलेर नयाँ सङ्कल्प, नयाँ उद्देश्य र नयाँ ऊर्जाका साथ पोखरामा नयाँ वर्ष २०२३ को स्वागत गरेका हुन्। अङ्ग्रेजी नयाँ वर्षमा काठमाण्डाै, पाेखरा, ठमेल लगायत सहरमा विदेशी पर्यटकसहित नेपालीहरुकाे भिड लागेकाे थियाे । 

यशु ख्रीस्टको जन्म भएको वर्षदेखि पादरी ग्रेगोरियनले सुरु गरेकाले यसलाई ग्रेगोरियन पात्रो भन्ने गरिन्छ । अङ्ग्रेजी नयाँ वर्षको अवसरमा नेपालसहित विश्वभरका मानिसले एक आपसमा शुभकामना आदान प्रदान गरिरहेका छन् । इसाइ धर्मका प्रवर्तक जिसस क्राइस्ट (यशु) को सम्झनामा उहाँको निधनपछि अनुयायीले यो सम्वत् प्रचलनमा ल्याएका हुन् ।

इस्वी सम्वत् नेपालमा प्रचलनमा नभए पनि केही वर्ष अघिदेखि अङ्ग्रेजी नयाँ वर्ष मनाउने गरिएको छ । विशेष गरी युवापुस्ताले अङ्ग्रेजी नयाँ वर्षलाई मनाउने गरेका छन् । विदेशी पर्यटकको भिडभाड हुने काठमाण्डौको ठमेल, बौद्ध, पोखरा, सौराहा, लुम्बिनीलगायत ठाउँमा आव विशेष कार्यक्रम हुँदै छन् । हिजो बेलुका पनि यी क्षेत्रमा ‘न्यू इयर इभ’ का कार्यक्रम भएका थिए ।