धनुषा – धनुषाको मुखियापट्टी मुसहरनिया गाउँपालिका–३ का ४० वर्षीय धानुक दासको हत्यामा संलग्न रहेको आरोपमा जेठी श्रीमती र छोरासहित तीन जना पक्राउ परेका छन् ।

प्रहरीले किरिया बसेका २० वर्षका छोरासहित तीन जनालाई पक्राउ गरेको हो । गएको पुस १० गते भएकाे हत्यामा संलग्न मुख्य व्यक्ति फरार रहेको र उनको खोजी भैरहेको प्रहरीले जनाएको छ । सम्पत्ति विवादको कारणले परिवारकै संलग्नतामा हत्या भएको हुनसक्ने प्रारम्भिक अनुसन्धानमा देखिएको र घटनाबारे थप अनुसन्धान भैरहेको धनुषाका प्रहरी उपरीक्षक विश्वराज खड्काले जानकारी दिनुभयो ।

दास घरमै ग्यारेज तथा ग्यासको पसल सञ्चालन गर्दै आएका थिए । मोटर मर्मत गर्ने विषयमा सेवाग्राही बनेर कुराकानी गर्न आएको व्यक्तिले गोली प्रहार गरी फरार भएको स्थानीयवासीहरुले बताएका छन् ।

दुईवटा विवाह गरेका दासको जेठी श्रीमतीतर्फ १८ र २० वर्षका दुई छोरा तथा कान्छी श्रीमतीतर्फ एउटा छोरी छन् । दास कान्छी श्रीमतीसँग बस्दै आएका थिए ।