धनुषा – धनुषाको मुखियापट्टी मुसहरनिया गाउँपालिका २ का धानुक दासको हत्यामा उहाँकै छोरा र ज्वाइँको संलग्नता रहेको पाइएको छ । ४० वर्षीय दासको गएकाे पुस १० गते आफ्नै ग्यारेजमा गोली प्रहार गरी हत्या गरिएको थियो ।

दासको हत्यामा संलग्न रहेको आरोपमा धनुषा प्रहरीले उहाँका छोरा र ज्वाइँसहित तीन जनालाई पक्राउ गरेको छ । एक जना अझै फरार रहेका छन् । दासको हत्यामा संलग्न रहेको आरोपमा प्रहरीले उहाँका छोरा प्रदीप दास, ज्वाइँ उदय दास र नगराइन नगरपालिकाकाे जटहीका शुटर रञ्जित यादवलाई पक्राउ गरेको हो ।

मृतक धानुक दासका ज्वाइँ उदय दास मधेस प्रदेश प्रहरी कार्यालय जनकपुरधामका चालक हुन् । तीनै जनालाई प्रदेश प्रहरी कार्यालय र जिल्ला प्रहरी कार्यालय धनुषाबाट खटेको संयुक्त टोलीले पक्राउ गरेको हो । घटनामा संलग्न भारत बिहारको खजुली बस्ने आकाश भनिने सोनु मिश्रा फरार रहेका प्रहरीले जनाएको छ ।

घरमा सम्पत्तिको विवाद चलिरहेको र त्यही कारण छोरा र ज्वाइँ मिलेर धानुककाे हत्याको योजना बनाएको प्रारम्भिक अनुसन्धानबाट खुलेको धनुषाका प्रहरी नायब उपरीक्षक विश्वराज खड्काले बताउनुभयाे । 

प्रदीपले नै पाँच लाख रुपैयाँमा शुटरसँग डिल गरेर हत्या गराउन लगाएको प्रहरीको दाबी छ । प्रहरीका अनुसार शुटरहरूलाई दुई पटकमा तीन लाख रुपैयाँ दिइसकिएको र दुई लाख रुपैयाँ दिन बाँकी रहेको थियो । केही दिनदेखि प्रदीप घरमै ग्यासको पसल सञ्चालन गर्दै आएका थिए । मोटर मर्मत गर्ने विषयमा सेवाग्राही बनेर कुराकानी गर्न गएको व्यक्तिले धानुकलाई गोली प्रहार गरी फरार भएको स्थानीयवासीले बताएका थिए । 

मृतक दासले दुई वटा विवाह गरेका थिए । जेठी श्रीमतीबाट २० र १८ वर्षका दुई छोरा छन् । कान्छी श्रीमतीबाट छ महिनाकी छोरी छिन् । दास ग्यारेज र पसल सञ्चालन गर्दै आएको घरमा कान्छी श्रीमतीसँग बस्दै आउनुभएकाे थियाे भने जेठी श्रीमती भित्री गाउँमा रहेको अर्कै घरमा छोराहरूसँग बस्दै आउनुभएकाे छ । कान्छी श्रीमतीसँग पनि एउटी छ महिनाकी छोरी छिन् । दासकी कान्छी श्रीमतीले पहिलेको श्रीमानलाई छोडेर दाससँग विवाह गर्नुभएकाे थियाे । 

केही दिनयता जेठी श्रीमतीसँग दासकाे विवाद हुँदै आएको थियो । सम्पत्ति विवादकाे कारणले दुई जनाबीच विवाद हुँदै आएकाे प्रहरी अनुसन्धानमा देखिएको छ । अर्को विवाह गरेपछि सम्पत्ति बाँड्नुपर्ने विषयमा भएको विवाद नै दासकाे हत्याको कारण रहेको प्रहरीको प्रारम्भिक अनुसन्धानले देखाएको छ ।