कास्की – भुटनिज युथ स्पोर्ट्स क्लब आहा रारा गोल्ड पाेखरा कपको फाइनलमा प्रवेश गरेको छ । पोखरा रङ्गशालामा आज विहीबार भएको दोस्रो सेमिफाइनल खेलमा चर्च ब्वाइज युनाइटेडलाई एक–शून्य गोलले हराउँदै पाहुना टोली भुटनिज फाइनल प्रवेश गरेको हो ।

पहिलो हाफको अतिरिक्त समयमा भुटनिज युथ स्पोर्ट्सले गोल गरेको थियो । प्रविन बस्नेतको फ्लिक पासलाई सदुपयोग गर्दै रोजिन प्रजापतिले गरेकाे गाेल नै निर्णायक भयाे । 

खेलको ८४ औँ मिनेटमा आशिष चौधरीले रातो कार्ड पाउँदै मैदान छाडेपछि चर्च ब्वाइज दश खेलाडीमा सीमित भएको थियो । खेलमा भुटनिजका रोजिन प्रजापति म्यान अफ दि म्याच भए ।

२२ औँ आहा रारा पोखरा गोल्ड कपको उपाधिका लागि सङ्कटा क्लब र भुटनिज युथ स्पोर्ट्स क्लबबीच पर्सि शनिवार प्रतिस्पर्धा हुने छ । विजेताले १२ लाख र उपविजेताले छ लाख रुपैयाँ प्राप्त गर्ने छ ।