साेलुखुम्बु - विश्वको प्रमुख पर्यटकीय गन्तव्य सगरमाथा क्षेत्र सुनसान बन्दै गएको छ । केही समय अघिसम्म पर्यटकले खचाखच भरिएको सोलुखुम्बुको खुम्बु क्षेत्र सिजन सकिएसँगै अहिले सुनसान बनेको हो । विमानस्थल, होटल, लज, क्याम्पिङ साइट, चौतारा, बाटोघाटो तथा दृश्यावलोकन गर्ने ठाउँ सुनसान भएका छन् ।

पर्यटनको सिजनमा व्यस्त भएका पर्यटन व्यवसायीहरु यतिखेर भने फुसर्दिला भएका छन् ।  फुर्सद भएसँगै अहिले आराम गर्ने, घुमफिरमा जाने गरेको होटल व्यवसायी याङ्जी शेर्पाले बताउनुभयो । सिजन सकिएसँगै यतिखेर खुम्बुवासी पूजापाठमा व्यस्त भएका व्यवसायी लामाकाजी शेर्पाले बताउनुभयो । सिजनमा कडा मेहनत गर्ने र ‘अफसिजन’ मा रमाइलो, घुमफिर, भ्रमण लगायतकाकार्यमा समय बिताउने खुम्बुका नागरिकको विशेषता जस्तै बनेको छ ।

खुम्बुमा वर्षको दुई पटक फागुन अन्तिमदेखि जेठ मध्यसम्म र असोजदेखि मंसिरसम्मलाई मुख्य पर्यटकीय सिजन मानिन्छ । सिजनमा दैनिक ७ सय जनासम्म पर्यटक भित्रिएका सगरमाथा राष्ट्रिय निकुञ्ज नाम्चेका प्रमुख संरक्षण अधिकृत भूमिराज उपाध्यायले बताउनुभयो ।

पर्यटकको आवगमन न्यून भएसँगै निकुञ्ज चेकपोष्टका कर्मचारीहरु पनि केही फुर्सदिला बनेका निकुञ्जको कार्यालयले जनाएको छ । यस्तै, सिजन सकिएसँगै लुक्ला विमानस्थलमा पनि यात्रुको चाप कम छ । पर्यटकको आवागमन घटेसँगै विमानस्थलमा चाप कम भएको हो । यो विमानस्थल अति जोखिममध्ये विश्वकै १०औँ नम्बरमा पर्छ । खुम्बु क्षेत्र ओहोरदोहोर गर्ने तथा विश्वको सर्वोच्च शिखर सगरमाथासहितको हिमालआरोहण गर्ने यात्रुले यही विमानस्थको प्रयोग गर्ने गरेका छन् ।

काठमाण्डाै–लुक्लाका लागि उडान भरिरहेका तारा र समिट एअरले अहिले यात्रु अभाव हुँदा कार्गो ढुवानी गर्न थालेका छन् ।