रोल्पा – नेपाल तरुण दल रोल्पा नगर कार्यसमितिका अध्यक्ष रोहित पुनको गोली हानी हत्या गरिएको विरोधमा तरुण दल रोल्पाले आज सदरमुकाम लिबाङमा विरोध प्रदर्शन गरेको छ ।

कांग्रेस जिल्ला पार्टी कार्यालयबाट सुरु भएको जुलुसले लोकतान्त्रिक चोक, पिपलचौतारा, सात्ताले खोला, शिवालय मन्दिर हुँदै जिल्ला प्रहरी कार्यालय अगाडि १५ मिनेट विरोध प्रदर्शन गरेको थियो । 

विरोध प्रदर्शनपछि विरोधसभामा बोल्दै रोल्पाका कांग्रेस नेताहरुले हत्या गरिएका पुनलाई शहीद घोषणा गर्नुपर्ने, परिवारलाई क्षतिपूर्ति दिनुपर्ने, परिवारको सुरक्षा दिनुपर्ने, हत्याराहरुलाई कानुनी कारबाही गर्नुपर्ने माग गरेका छन् ।

घटनामा संलग्न रहेको आरोपमा प्रहरीले ५ जनालाई पक्राउ गरेको छ । घटनामा संलग्न अन्य ३ जना फरार रहेको बताइएको छ । पुनको आइतबार रोल्पाको सुलिचौरमा एक रेष्टुरेन्टमा गोली हानी हत्या भएको थियो ।