डोटी – सुदूरपश्चिम प्रदेशका मुख्यमन्त्री त्रिलोचन भट्टले माओवादीले देशमा आमूल परिवर्तन गरेकाे दाबी गर्नुभएकाे छ । 

नेकपा (माओवादी केन्द्र) डोटीले आज साेमवार जिल्ला सदरमुकाम सिलगढीमा आयोजना गरेको जनसम्बन्ध विस्तार तथा सङ्ठन सुदृढीकरण अभियान एवम् प्रशिक्षण कार्यक्रमलाई सम्बोधन गर्दै भट्टले नेकपा माओवादीका कारण देशमा आमूल परिर्वतन भएको र नागरिकले बोल्न पाउने अधिकार पाएको बताउनुभयो । उहाँले भन्नुभयो, यो देशमा सबै चिजको परिर्वतन माओवादीले गरेको हो, जनताले निर्धक्कका साथ बोल्न पाएको र आफ्ना अधिकारका बारेमा बोल्न पाएको माओवादीकै कारणले हो । मुख्यमन्त्री भट्टले सङ्घीयता, पालिका सरकारलाई कानुन बनाउनेदेखि न्यायिक अधिकार सबै माओवादी पार्टीले दिएको दाबी गर्नुभयो । 

यसैगरी उहाँले आफू मुख्यमन्त्री भएपछि डोटीका लागि थुप्रै विकास गरेको दाबी गर्दै बाँकी रहेका अधुरा विकासका काम पनि पूर्ण गर्ने प्रतिबद्धता जनाउनुभयो । आफूले गरेका विकासका कामलाई लिएर नागरिकका घरघरमा जान र नागरिकलाई त्यसबारेमा जानकारी गराउनसमेत मुख्यमन्त्री भट्टले कार्यकर्तालाई निर्देशन दिनुभयो । 

मुख्यमन्त्री भट्टले माओवादीका नेता, कार्यकर्ता सहरमुखी नभएर गाउँमुखी हुनुपर्ने बताउनुभयो । उहाँले भन्नुभयो, माओवादीका नेताहरू सहरमा होइन अब गाउँमा जनतामाझ जानुपर्छ । आफ्ना योजना, काम जनताका माझमा लैजानुस्, गाउँ जान डराउनुपर्ने कुनै कारण छैन ।