व्यापक विरोधपछि फिफाकाे विश्वकपसम्बन्धी विवादास्पद लगानी योजना रद्द

व्यापक विरोधपछि फिफाले विश्वकपसम्बन्धी विवादास्पद लगानीको योजना रद्द गरेको छ । विश्व फुटबलको सर्वोच्च निकाय फिफाका अध्यक्ष जियानी इन्फान्टिनोले प्रमुख प्रतियोगितामा हिस्सेदारी बिक्री गर्ने विवादास्पद योजना रद्द गरेको बताउनुभएको छ ।

इन्फान्टिनोले प्रस्तावित परियोजनाले ‘विभाजन सिर्जना गरेको र यो अब संस्थाको मूल उद्देश्यको हितमा नरहेको बताएको बीबीसीले जनाएको छ । सदस्य देशका फुटबल संघबाट तीव्र विरोध भएपछि फिफाले गएराति विवादास्पद योजना अघि नबढाउने निर्णय गरेको हो ।

यसअघि विश्वकपसहित आफ्ना प्रमुख प्रतियोगिताहरू सञ्चालन गर्ने नयाँ कम्पनीमा झण्डै २० प्रतिशत हिस्सा बिक्री गरेर ४.२ अर्ब अमेरिकी डलरसम्म जुटाउने योजना सार्वजनिक गरिएको थियो । तर प्रस्ताव सार्वजनिक भएलगत्तै युरोपेली फुटबल महासंघ (यूईएफए) ले कडा विरोध जनाएको थियो ।

एसियाली फुटबल महासंघ (एएफसी) ले पनि फिफाको निर्णय प्रक्रियामाथि प्रश्न उठाएको छ । त्यस्तै प्रस्ताव फिर्ता लिनुअघि नै इन्फान्टिनोका वरिष्ठ सल्लाहकार कार्लोस कोर्डेरोले तत्काल लागु हुने गरी राजीनामा दिनुभएको छ ।