नाडाको ५० औँ स्वर्ण वर्षमा ५० प्रतिशत ‘अर्ली बर्ड’ छुट

काठमाण्डाै – नेपाल अटोमोबाइल्स एसोसिएसन अफ नेपाल (नाडा) ले आफ्नो स्थापनाको ५०औँ स्वर्ण वर्षको अवसर पारेर १८औँ अटो शो २०२६ आयोजना गर्ने भएको छ ।

आउँदाे भदौ ९ देखि १४ गतेसम्म काठमाण्डाैको भृकुटीमण्डप प्रदर्शनीस्थलमा आयोजना हुने मेलाका लागि आयोजकले डिजिटल टिकट
खरिदमा ५० प्रतिशतसम्मको ‘अर्ली बर्ड’ छुटको घोषणा गरेको छ ।

अटोमोबाइल क्षेत्रको बहुप्रतीक्षित मानिएको यस प्रदर्शनीलाई यस वर्ष एचपी लुब्रिकेन्ट्सले मुख्य प्रायोजन गरेको छ । ५ दशक लामो ऐतिहासिक यात्रा पूरा गरेको उत्सव मनाउन नाडाले अवलोकनकर्ताहरूका लागि खल्ती एपसँगको सहकार्यमा विशेष प्रवर्द्धनात्मक अफर ल्याएको हो ।

अफर अन्तर्गत खल्ती एपमा गएर वा आधिकारिक खल्तीको क्यूआर स्क्यान गरी अग्रिम टिकट खरिद गर्ने अवलोकनकर्ताहरूले साधारण र विद्यार्थी दुवै प्रकारका टिकटमा ५० प्रतिशत छुट पाउने आयाेजकले जनाएकाे छ । यो छुट योजना सीमित अवधिका लागि मात्र रहने छ ।

यस वर्षको प्रदर्शनीमा नवीनतम विद्युतीय गाडी (ईभी) तथा इन्धनबाट चल्ने दुईपाङ्ग्रे र चारपाङ्ग्रे गाडी, अत्याधुनिक अटो प्रविधि, पार्टपुर्जा, लुब्रिकेन्टका साथै वित्तीय तथा बीमा सुविधाहरू एकै ठाउँमा उपलब्ध गराइनेछन् ।