इलाम–राजदुवाली सडक एक महिनादेखि अवरुद्ध हुँदा जनजीवन प्रभावित

काठमाण्डौ — मेची राजमार्गअन्तर्गत इलाम–राजदुवाली सडक खण्ड एक महिनादेखि अवरुद्ध हुँदा पूर्वी पहाडी जिल्लाको जनजीवन प्रभावित भएको छ ।

गएको असार २३ गते इलाम नगरपालिका–९ मा रहेको राजदुवाली क्षेत्रमा पहिरो खस्नुका साथै सडक भाँसिएपछि झापासँगको सीधा सडक सम्पर्क विच्छेद भएको हो । लगातारको वर्षाका कारण सडक मर्मतमा कठिनाइ भइरहेको सडक डिभिजन कार्यालयले जनाएको छ ।

सडक अवरुद्ध भएपछि यात्रुहरू माइखोला क्षेत्रमा करिब डेढ किलोमिटर पैदल आवतजावत गर्न बाध्य छन् । बिरामी, अशक्त र ज्येष्ठ नागरिकलाई भने सुरक्षाकर्मीको संयुक्त टोलीले स्ट्रेचरमा बोकेर वारपार गराइरहेको छ ।

यसैबीच, लामो समय सडक बन्द हुँदा इलामसहित पाँचथर र ताप्लेजुङमा उपभोग्य सामग्रीको मूल्य वृद्धि भएको छ भने खाना पकाउने ग्यासको चरम अभाव देखिएको छ । वैकल्पिक सडकहरूमा पनि खोलामा पुल नहुँदा आवतजावतमा थप सास्ती भएको छ ।