१५औँ महाधिवेशनको कार्यतालिका तलमाथि हुँदैन : सभापति थापा

काठमाण्डाै – नेपाली कांग्रेसका सभापति गगनकुमार थापाले पार्टीको १५औँ राष्ट्रिय महाधिवेशनका लागि तय भएको मिति कुनै पनि हालतमा तलमाथि गर्न नसकिने बताउनुभएको छ ।

पार्टी केन्द्रीय कार्यालय सानेपा, ललितपुरमा आज केन्द्रीय कार्यसमिति बैठकलाई सम्बोधन गर्दै सभापति थापाले आउँदाे असोज १६ देखि १९ गतेसम्म महाधिवेशन गर्ने गरी तय गरिएको कार्यतालिका नै अन्तिम भएको बताउनुभएको हो । पार्टी विधान र कानूनअनुसार तय भएकाे कार्यतालिका परिवर्तन गर्ने अधिकार कसैलाई नभएको उहाँले तर्क गर्नुभयो ।

उहाँले भन्नुभयो, ‘पार्टीको महाधिवेशनका लागि जुन मिति तय गरिएको छ त्यो तलमाथि गर्ने सुविधा हामी कसैलाई पनि छैन । किनभने हाम्रो विधानको व्यवस्थाले त्यो कुरा तोकिदिएको छ । त्यस कारण असोज १६–१९ गतेसम्म नै महाधिवेशन हुन्छ ।’

सभापति थापाले पार्टीको वैधानिकता र विशेष महाधिवेशनका सम्बन्धमा सर्वोच्च अदालतले दिएको पुनरवलोकन आदेशलाई सामान्य रूपमा लिएको भन्दै पुनः न्यायालयको सामना गर्ने बताउनुभयाे । विधानसम्मत भएको विशेष महाधिवेशनलाई यसअघि नै  निर्वाचन आयोग र सर्वोच्च अदालतले वैधानिकता दिइसकेको भन्दै डराउनुपर्ने अवस्था नरहेको उहाँकाे भनाइ छ ।

थापाले १५औँ महाधिवेशनलाई निष्पक्ष र पारदर्शी बनाउने कुरामा समेत बैठकमा छलफल गर्नुपर्ने बताउनुभयो ।