‘नाइमा मोबिलिटी एक्स्पो’मा नयाँ मोडलका गाडी मुख्य आकर्षण

काठमाण्डौ — चाडपर्व नजिकिएसँगै यसपालि पनि अटो व्यवसायीहरूको व्यस्तता बढेको छ । दुईवटा अटो शोमार्फत व्यवसायीहरूले नयाँ गाडीहरू लन्च गर्ने प्रतिस्पर्धा थालेका छन् ।

पहिलेका वर्षहरुमा एउटा मात्र नाडा अटो शो हुने गरेकोमा गएको वर्षदेखि दुईवटा अटो शो हुन थालेका छन् । यो वर्ष पनि अटो व्यवसायीहरूका दुई ठुला छाता संस्थाहरू नेपाल अटोमोबाइल इम्पोर्टर्स एण्ड म्यानुफ्याक्चरर्स एसोसिएसन (नाइमा) र नाडा अटोमोबाइल्स एसोसिएसन अफ नेपाल (नाडा) ले छुट्टाछुट्टै अटो शो आयोजना गर्दैछन् ।

भोलि साउन २६ गतेदेखि ३१ गतेसम्म नाइमाको आयोजनामा ‘नाइमा मोबिलिटी एक्स्पो–२०२६’ हुँदैछ भने भदौ ९ गतेदेखि १४ गतेसम्म नाडाको आयोजनामा ‘नाडा अटो शो–२०२६’ सञ्चालन हुनेछ ।

भोलिदेखि शुरु हुने नाइमा मोबिलिटी एक्स्पोमा विभिन्न ५५ वटा ब्रान्डका गाडीसाधनहरू प्रदर्शनीमा राखिनेछन् । त्यसमध्ये करिब ४० वटा नयाँ मोडलका गाडी तथा मोटरसाइकलहरू पहिलो पटक सार्वजनिक तथा लन्च गर्ने नाइमाको तयारी छ  ।

आगन्तुकहरूलाई लक्षित गर्दै आयोजकले डिजिटल टिकटको समेत व्यवस्था गरेको छ । डिजिटल टिकट काट्दा अधिकतम ५० प्रतिशतसम्म क्यासब्याक पाउन सकिने व्यवस्था मिलाइएको छ ।

नाइमाका अनुसार एक्स्पोमा दुईपांग्रे, चारपांग्रे, कमर्सियल भेहिकल, विद्युतीय तथा हाइब्रिड मोबिलिटी सोलुसन, प्रविधि, सेवा तथा मोबिलिटीसम्बन्धी अरु उत्पादनहरू पनि समेटिनेछन् ।

भोलिदेखि शुरु हुने नाइमा एक्स्पो र भदौ ९ गतेदेखि शुरु हुने नाडा अटो शोले सुस्ताएको अटो बजारलाई पुनः चलायमान बनाउने अपेक्षा गरिएको छ ।