भृकुटीमण्डपमा आकर्षक गाडीहरूको प्रदर्शनी (फोटो‌फिचर)

काठमाण्डौ - भृकुटीमण्डपमा आजदेखि ‘नाइमा नेपाल मोबिलिटी एक्स्पो–२०२६’ शुरु भएको छ। नेपाल अटोमोबाइल इम्पोर्टर्स एन्ड म्यानुफ्याक्चर्स एसोसिएसन (नाइमा)ले आयोजना गरेको एक्स्पो आउँदो साउन ३१ गतेसम्म सञ्चालन हुने आयोजकले जनाएको छ । 

एक्स्पोमा विभिन्न अटोमोबाइल ब्रान्डका नयाँ सवारीसाधन तथा उत्पादन प्रदर्शनमा राखिएका छन् । एक्स्पोमा विद्युतीय सवारीसाधनको बाहुल्यता देखिन्छ । १८ लाख रुपैयाँदेखि ३ करोड रुपैयाँसम्मका विद्युतीय गाडी प्रदर्शनमा राखिएका छन् । 

एक्स्पोमा दुईपाङग्रे, चारपाङग्रे, कमर्सियल भेहिकल, विद्युतीय तथा हाइब्रिड मोबिलिटी सोलुसन, प्रविधि, सेवा तथा मोबिलिटीसम्बन्धी उत्पादनहरू राखिएका छन् । 

विभिन्न कम्पनीले आफ्ना नयाँ मोडलका कार, मोटरसाइकल तथा स्कुटर प्रदर्शनमा राखेका छन् । आयोजकका अनुसार एक्स्पोमा ५० भन्दा बढी ब्रान्डको सहभागिता छ । एक्स्पोमा दुईपाङग्रे सवारीका १८ र चारपाङग्रेका २९ नयाँ ब्रान्ड सार्वजनिक गरिँदै छ। एक्स्पोमा ५२ वटा स्टल रहेका छन् ।

प्रदर्शनीमा राखिएका सवारीसाधनबारे जानकारी लिन अवलोकनकर्ताहरू विभिन्न स्टलमा पुगेका छन् । सहभागी कम्पनीहरूले आफ्ना सवारीसाधन तथा उत्पादनबारे जानकारी दिनुका साथै विभिन्न छुटमा सवारी बुकिङको व्यवस्था गरेका छन् ।