खाना पकाउने ग्यास लिनेकाे लाइन (तस्वीरहरू)

काठमाण्डाै – नेपाल आयल निगमले आज काठमाण्डाैका ५ वटा ठाउँबाट खाना पकाउने एलपी ग्यास सिलिन्डर बिक्री गरिरहेकाे छ ।

निगमले टेकुमा रहेको निगमको कार्यालय, चाबहिलको यातायात कार्यालय परिसर, कीर्तिपुरको राधास्वामी परिसर, बसुन्धराको राधास्वामी परिसर र बबरमहलको पुरानो जिल्ला प्रशासन कार्यालय परिसरबाट ग्यास बिक्री गरिरहेको हाे ।

ग्यास बिक्री भइरहेका सबै ठाउँमा उपभोक्ताको लामो लाइन लागेको छ । निगमले लामो समयदेखि ग्यास आपूर्ति नियमित रहेको दाबी गरिरहेको भए पनि उपभोक्ता गाडी भाडा तिरेर टाढादेखि सिलिन्डर र नागरिकता बोकेर लाइनमा बसेका छन् ।

यसैबीच निगमले ग्यास लिन नागरिकता वा राष्ट्रिय परिचयपत्र अनिवार्य लिएर आउनू भन्दै सूचना निकालेपछि त्यसको व्यापक विरोध भएको छ ।

घर नजिकैको डिपोमा सहजै पाउनुपर्ने अत्यावश्यक वस्तु निगमले तोकेकै ठाउँमा खाली सिलिन्डर बोकेर पुग्नुपर्ने र त्यसमा पनि नागरिकता वा राष्ट्रिय परिचयपत्र अनिवार्य गरेपछि त्यसको विरोध भएको हो । कतिपयसँग नागरिकता वा राष्ट्रिय परिचयपत्र नभएमा खाना पकाउनै नपाउने हो भन्दै उपभोक्ताले प्रश्न गरेका छन् ।

बबरमहलमा ग्यास लिनेकाे लाइन । तस्वीर : हरिराम भेटुवाल/रासस