नेभिगेशन
बुधबार, मंसिर २, २०८३

भोटेकोशी बाढी पीडितको सम्झनामा कोप–३१ मा प्रदर्शन

काठमाण्डाै – टर्किएको अन्ताल्यामा चलिरहेको जलवायु सम्मेलन (कोप–३१) को वार्ताबीच भोटेकोशी विपद्का पीडितको सम्झनामा साङ्केतिक प्रदर्शन भएको छ ।

नेपालका युवा, आदिवासी जनजाति अगुवा तथा अन्तर्राष्ट्रिय जलवायु अभियन्ताहरूले मृतकको प्रतीकका रूपमा पुतला राखेर मैनबत्ती बाल्दै ग्लोबल साउथका लागि जलवायु न्याय, क्षतिपूर्ति र ऋणरहित वित्तको माग गरेका हुन् ।

गएको भदौ १० गते नेपालमा आएको विनाशकारी बाढीले पुर्‍याएको क्षतिप्रति अन्तर्राष्ट्रिय समुदायको ध्यानाकर्षण गराउन प्रदर्शन गरिएको हो ।

2-1794996322.jpg

प्रदर्शनमा सहभागी अभियन्ता आकृति डोटेलले अब सहानुभूति मात्र नभई प्रभावित समुदायको पुनर्स्थापनाका लागि ऋणको सट्टा ठोस अनुदान र क्षतिपूर्ति आवश्यक रहेको बताउनुभयो ।

अर्का अभियन्ता प्रयास अधिकारीले कोपका दस्तावेज र साना बुँदामा बहस भइरहँदा जमिनमा नागरिकले ज्यान र जीविकोपार्जन गुमाइरहेको भन्दै वार्तालाई तत्काल प्रस्ट उपलब्धिमा बदल्न आग्रह गर्नुभयो ।

यस्तै अभियन्ता प्रज्ञा शेरचनले जलवायु सङ्कटमा नेपालको योगदान न्यून भए पनि क्षति उच्च भइरहेको बताउँदै विकसित देशहरूलाई हानि तथा नोक्सानी कोषमा पर्याप्त रकम भर्न र निर्णय अर्को सम्मेलनसम्म नसार्न चेतावनी दिनुभयो ।

प्रदर्शनको अन्त्यमा भोटेकोशीका मृतक र प्रभावितको सम्झनामा एक मिनेट मौनधारण गरिएको थियो ।

– न्युज एजेन्सी नेपाल

प्रकाशित मिति:
थप समाज