वर्षा पश्चिमी भूभागतर्फ बढी केन्द्रित

काठमाण्डौ — देशका पश्चिमी भूभागमा हल्कादेखि मध्यम वर्षा भइरहेको छ । मौसम पूर्वानुमान महाशाखा अनुसार गएराति देशका सबैजसो ठाउँमा पानी परे पनि अहिले भने पानी पार्ने प्रणाली पश्चिमतर्फ सर्दै गएको छ ।

पछिल्लो ६ घण्टामा तनहुँमा ७२.८ मिलिमिटर पानी परेको छ । त्यसैगरी लमजुङ, नवलपरासी पूर्व, पाल्पा, म्याग्दीमा मध्यम वर्षा भएको छ । पूर्वमा खोटाङ, संखुवासभा, भापामा हल्कादेखि मध्यम वर्षा भएको छ ।

मधेश प्रदेशमा भने वर्षा एकदमै कम भएको छ । अहिले कञ्चनपुरमा मध्यम वर्षा भइरहेको छ । गण्डकी प्रदेशका पहाडी तथा तराई क्षेत्र तथा लुम्बिनी, कर्णाली र सुदूरपश्चिमका पहाडी तथा तराई भूभागमा वर्षा भइरहेको छ । त्यस्तै पूर्व झापामा मध्यम वर्षा भइरहेको छ ।

महाशाखाका अनुसार आज गण्डकी, लुम्बिनी, कर्णाली र सुदूरपश्चिम प्रदेशको पहाडी भू–भाग तथा लुम्बिनी र सुदूरपश्चिम प्रदेशका तराई भू–भागका एक दुई ठाउँमा ठूलो पानी पर्ने सम्भावना रहकोे छ । विशेषगरी लुम्बिनी प्रदेशको तराई भू–भागका एक–दुई ठाउँमा भने मुसलधारे वर्षाको अनुमान छ ।

त्यस्तै गण्डकी, लुम्बिनी, कर्णाली र सुदूरपश्चिम प्रदेशका हिमाली र पहाडी भू–भागका धेरै ठाउँ, कोशी र बागमती प्रदेशका हिमाली र पहाडी भू–भागका केही ठाउँमा मध्यमसम्मको वर्षाको सम्भावना छ । कोशी र बागमती प्रदेशका तराई भू–भागका थोरै ठाउँमा पनि मध्यम वर्षाको सम्भावना कायमै छ ।