मेटाले मुद्दा हारेमा फेसबुक र इन्स्टाग्राममा ठूलो परिवर्तन हुने

अमेरिकाका विभिन्न ३० वटा राज्यहरुले दायर गरेको मुद्दा मेटाले हारेमा फेसबुक र इन्स्टाग्राममा ठूलो परिवर्तन हुने देखिएको छ । मुद्दाको सुनुवाइ भोलिदेखि शुरु हुँदैछ ।

ती राज्यहरूले मेटाले बालबालिका तथा किशोर–किशोरीको गोपनीयता कानुन उल्लंघन गरेको र उनीहरूलाई लामो समयसम्म सामाजिक सञ्जालमा व्यस्त राख्ने गरी प्लेटफर्म डिजाइन गरेको आरोप लगाएका छन् ।

फेसबुक र इन्स्टाग्रामका ‘लाइक’, सिफारिस प्रणाली, अटो–प्ले भिडियो, बारम्बार आउने नोटिफिकेसन र फोटो फिल्टरजस्ता सुविधामाथि ती राज्यहरुले मुख्य आरोप लगाएका छन् । यी सुविधाले किशोरकिशोरीलाई सामाजिक सञ्जालमा बढी समय बिताउन प्रेरित गर्नुका साथै सामाजिक तुलना, अस्वीकृतिको भावना र आत्मसम्मानमा नकारात्मक असर पार्न सक्ने दाबी गरिएको छ ।

त्यसैले प्रयोगकर्ताका लागि ‘लाइक’ संख्या हटाउने, नोटिफिकेसन सीमित गर्ने, सिफारिस प्रणाली परिवर्तन गर्ने र केही फोटो फिल्टर हटाउनेसम्मका माग मुद्दामा गरिएको बीबीसीले जनाएको छ ।

मेटाले भने आरोप अस्वीकार गर्दै युवाको सुरक्षा र कल्याणका लागि आफूले काम गरिरहेको दाबी गरेको छ । यदि ३० राज्यको मुद्दामा फैसला मेटाविरुद्ध आयो भने फेसबुक र इन्स्टाग्राममा किशोरले प्रयोग गर्ने धेरै सुविधामा ठूलो परिवर्तन आउन सक्छ ।

‘लाइक’ देखाउने व्यवस्था हट्न सक्छ, नोटिफिकेसन सीमित हुन सक्छ र किशोरलाई लामो समय एपमा राख्ने सिफारिस प्रणालीसमेत परिवर्तन गर्नुपर्ने हुन सक्छ ।