इन्फान्टिनोको आलोचना गरेपछि फिफाका अधिकारी बर्खास्त

काठमाण्डाै – विश्व फुटबलको नियामक निकाय फिफाले प्रमुख सञ्चालन अधिकृत (सीओओ) केभिन लामोरलाई बर्खास्त गरेको छ ।

फिफाका प्रतियोगिताहरूमा निजी लगानीकर्ताहरूलाई हिस्सेदारी बिक्री गर्ने अध्यक्ष जियानी इन्फान्टिनोको योजनाको कडा आलोचना गरेको ३ हप्ताभन्दा कम समयमै उनलाई बर्खास्त गरिएको बीबीसीले जनाएको छ । इन्फान्टिनोको यो योजना पछि रद्द भएको थियो ।

फिफा र प्रमुख सञ्चालन अधिकृतका रूपमा केभिन लामोरबीचको कार्य–सम्बन्ध हिजोदेखि समाप्त भएको संस्थाका प्रवक्ताले विज्ञप्तिमार्फत जानकारी गराएका छन् ।

गएराति फिफाका कर्मचारीहरूलाई महासचिव म्याथियास ग्राफस्ट्रोमले इमेलमार्फत यससम्बन्धी जानकारी गराएका थिए । उनले फिफा र लामुर अलग हुन सहमत भएको बताएका थिए ।

गएको महिना केभिन लामुरले विवादास्पद ‘फिफा फर्वार्ड इन्टरप्राइज’ (एफएफई)’ योजनाहरूलाई एक व्यक्तिको परियोजना भनेर आलोचना गरेका थिए । उनले अब फुटबलका राजनीतिक नेतृत्वहरूका लागि आफूलाई सही प्रश्नहरू सोध्ने र सही निर्णयहरू लिने समय आएको बताएका थिए ।

यसअघि यूईएफएमा उपमहासचिवको भूमिका निर्वाह गरिसकेका लामोर सन् २०२४ को नोभेम्बरमा फिफामा आबद्ध भएका थिए, उनी व्यवस्थापनको तहमा जियानी इन्फान्टिनोभन्दा २ तह तल थिए ।