‘नाडा अटो शो’ भदौ ९ देखि १४ गतेसम्म

उज्यालो सहकर्मी

बुधबार, भदौ ३, २०८३

काठमाण्डौ - नेपालको अग्रणी अटोमोबाइल प्रदर्शनी ‘नाडा अटो शो २०२६’ को १८औँ संस्करण यही भदौ ९ देखि १४ गतेसम्म आयोजना हुने भएको छ । नाडा अटोमोबाइल्स एशोसिएशन अफ नेपालले आयोजना गर्ने मेला काठमाण्डौको भृकुटीमण्डप प्रदर्शनी स्थलमा सञ्चालन हुनेछ ।

नाडाको ५०औँ वार्षिकोत्सवको उपलक्ष्यमा १८औँ संस्करणलाई ‘स्वर्ण उत्सव संस्करण’ का रूपमा भव्यताका साथ आयोजना गर्न लागेको आयोजकले जनाएको छ ।

६ दिनसम्म चल्ने प्रदर्शनीमा २०० वटाभन्दा धेरै स्टल रहनेछन् । स्टलमा २३ वटा ब्रान्डका पेसेन्जर कार भेहिकल, १७ वटा ब्रान्डका लाइट कमर्शियल भेहिकल, १३ वटा ब्रान्डका दुईपाङ्ग्रे गाडी, १० वटा वित्तीय एवम् बीमा सेवा प्रदायक, ७० वटा अटोमोटिभ पार्टपुर्जा, एसेसरिज, टायर, लुब्रिकेन्ट्स, ग्यारेज उपकरण र अन्य सम्बन्धित उत्पादन रहनेछन् । साथै यस पटक नेपालमै एसेम्बल हुने गाडी, ल्युब, ब्याट्री, हेल्मेट एवम् अन्य स्थानीय सामग्रीहरूको विशेष प्रवर्द्धनसमेत गरिने आयोजकले जनाएको छ ।

अवलोकनकर्ताको सहजताका लागि दुईपाङ्ग्रे, चारपाङ्ग्रे, वित्तीय संस्था र अटो कम्पोनेन्ट्सका छुट्टाछुट्टै जोनहरू छुट्याइएका छन् । टिकटका लागि ‘खल्ती एप’ मार्फत अग्रिम खरिदको व्यवस्था मिलाइएको छ भने निश्चित अवधिका लागि ५० प्रतिशत क्यास ब्याकको सुविधासमेत उपलब्ध छ ।

साथै नेपाल पुलिस क्लबको ब्लु पेभिलियनको अन्डरग्राउन्ड पार्किङ र सिंहदरबारमा रहेको नेशनल ट्रेडिङ परिसरमा पार्किङको व्यवस्था गरिएको छ । प्रदर्शनी स्थलमा मिडिया डेस्क, ट्राफिक सूचना डेस्क, क्याफेटेरिया, आपत्कालीन स्वास्थ्य टोली, सीसीटीभी सुरक्षा निगरानी, आगो नियन्त्रण व्यवस्था तथा ह्वीलचेयरमैत्री संरचनाको पनि प्रबन्ध मिलाइएको आयोजकले जनाएको छ ।

प्रदर्शनीमा झन्डै २ लाख जना अवलोकनकर्ता आउने नाडाको विश्वास छ ।

प्रकाशित मिति: बुधबार, भदौ ३, २०८३ ०५:५०