एशियाकै सबैभन्दा ठूलो खेलकुद मेला एशियन गेम्स शुरु हुन एक महिना बाँकी

एशियाकै सबैभन्दा ठूलो खेलकुद मेला २० औं एशियन गेम्स शुरु हुन अब एक महिना मात्र बाँकी छ ।

ओलम्पिक काउन्सिल अफ एशिया र आइची–नागोया एसियन गेम्स आयोजक समितिले आउँदो सेप्टेम्बर १९ देखि अक्टोबर ४ अर्थात असोज ३ गतेदेखि असोज १८ गतेसम्म हुने एसियाको सबैभन्दा ठूलो बहु–खेलकुद प्रतियोगिता २०औँ एसियन गेम्स शुरु हुन अब एक महिना मात्र बाँकी रहेको अवसरमा उत्सव मनाएका छन् ।

१६ दिनसम्म चल्ने यस खेलकुद प्रतियोगितामा एशियाका ४५ देशका ११ हजारभन्दा बढी खेलाडी र ६ हजार पदाधिकारी सहभागी हुने ओलम्पिक काउन्सिल अफ एशिया (ओसिए) ले जनाएको छ ।

एशियन गेम्समा नेपालबाट २२ खेलमा १३६ खेलाडी सहभागी हुँदैछन् । यसले एशियाली खेलकुदको इतिहासमा एउटा ऐतिहासिक उत्सवको रूप लिने अपेक्षा गरिएको ओसिएले जनाएको छ ।

जापानले एसियन गेम्स आयोजना गर्न लागेको यो तेस्रो पटक हो । यसअघि जापानले दुई पटक टोकियो (१९५८) र हिरोसिमा (१९९४) एसियन गेम्स सफलतापूर्वक आयोजना गरेको थियो । विश्वभरका करोडौँ दर्शकले प्रत्यक्ष तथा विभिन्न माध्यमबाट प्रतियोगिताको प्रसारण हेर्ने अपेक्षा गरिएको छ ।