कर्नाटकसँगको अभ्यास खेलमा नेपालको लगातार दोस्रो जित

भारत भ्रमणमा रहेको नेपाली राष्ट्रिय क्रिकेट टोलीले दोस्रो एकदिवसीय अभ्यास खेलमा पनि कर्नाटकलाई हराएको छ ।

हिजो भएको खेलमा नेपालले कर्नाटकलाई ५ विकेटले हरायो । कर्नाटकले दिएको २४३ रनको लक्ष्य नेपालले ४४ ओभर ३ बलमा ५ विकेट गुमाएर भेट्टायो ।

नेपालको जितमा देव खनालले शतकीय पारी खेले । उनले ११३ बलमा अविजित एक सय रन बनाए । त्यसअघि पहिला ब्याटिङ गरेको कर्नाटकले निर्धारित ५० ओभरमा ८ विकेट गुमाएर २४२ रन बनाएको थियो । नेपालका लागि बलिङतर्फ करण केसी र सन्दीप लामिछानेले समान तीन/तीन तथा हेमन्त धामीले दुई विकेट लिए ।

कर्नाटकलाई पहिलो अभ्यास खेलमा नेपालले ११६ रनले पराजित गरेको थियो । नेपाली टोली भारतमा थप अभ्यास खेलेपछि एसीसी प्रिमियर कप खेल्न मलेसिया जानेछ ।

प्रतियोगितामा नेपालले समूह चरणको पहिलो खेलमा यही भदौ १५ गते बहराइनसँग खेल्नेछ ।