राहत र उद्धारका लागि राष्ट्रिय र अन्तर्राष्ट्रियस्तरमा समन्वय भइरहेको छ : परराष्ट्रमन्त्री

काठमाण्डाै – परराष्ट्रमन्त्री शिशिर खनालले भोटेकोशी नदीमा आएको बाढीका कारण रसुवालगायत तल्लो तटीय क्षेत्रमा भएको जनधनको क्षतिप्रति दुःख व्यक्त गर्दै राहत र उद्धारमा सरकार केन्द्रित रहेको बताउनुभएको छ ।

विपद्को पछिल्लो अवस्थाबारे सरकारका तर्फबाट सदनलाई जानकारी गराउँदै उहाँले राहत परिचालन गर्न सरकारले राष्ट्रिय र अन्तरराष्ट्रियरूपमा समन्वय गरिरहेको बताउनुभयो ।

मन्त्री खनालले खोज तथा उद्धार कार्यलाई तीव्र बनाउन रसुवा तथा नुवाकोटमा नेपाली सेना र निजी क्षेत्रका गरी १३ वटा हेलिकप्टर परिचालन गरिएको बताउनुभयो । साथै प्रभावित क्षेत्रमा आवश्यकताअनुसार थप हवाई तथा स्थल उद्धार स्रोत परिचालन गरिने उहाँले जानकारी दिनुभयो । उहाँका अनुसार उद्धार गरिएका घाइते नागरिकको उपचारका लागि नुवाकोट जिल्ला अस्पतालमा नेपाली सेनाका १५, नेपाल प्रहरीका १२ र सशस्त्र प्रहरी बलका १५ जना थप चिकित्सकसहितको स्वास्थ्य टोली पठाइएको छ ।

गम्भीर प्रकृतिको घाइतेको उपचारका लागि राष्ट्रिय ट्रमा सेन्टर, वीर अस्पताल र त्रिभुवन विश्वविद्यालय शिक्षण अस्पताललगायत पाँच वटा स्वास्थ्य संस्थालाई तयारी अवस्थामा राखिएको छ ।

मन्त्री खनालका अनुसार सरकारको सम्पूर्ण ध्यान प्रभावित नागरिकको जीवन रक्षा, खोज तथा उद्धार, उपचार, राहत तथा सुरक्षित स्थानान्तरणमा केन्द्रित रहेको छ । उहाँले विपद् एवम् सम्भावित जोखिमबारे उत्तरी छिमेकी चीनसँग पनि समन्वय भइरहेको जानकारी दिनुभयो ।

मित्रराष्ट्रहरूले राहत र उद्धारको सहयोग गर्ने भन्ने प्रतिबद्धता यति बेला आइरहेको र परराष्ट्र मन्त्रालयले समन्वय गर्दै आएको उहाँले जानकारी दिनुभयो ।