खोज तथा उद्धारको काम चल्दै, हराएका व्यक्तिको विवरण उपलब्ध गराउन प्रहरीको आग्रह

काठमाण्डौ – रसुवाको भोटेकोशी नदीमा अस्ति बुधवार बिहान आएको भीषण बाढीबाट प्रभावित ठाउँमा खोज तथा उद्धारको काम आज पनि भैरहेको छ । खोज, उद्धार, उपचार, राहत तथा पुनः स्थापनाका लागि राज्यका सबै संयन्त्र परिचालन गरिएको सरकारले जनाएको छ ।

सडक तथा स्थलमार्ग अवरुद्ध भएपछि प्रभावित क्षेत्रमा उद्धार तथा राहतको लागि नेपाली सेनाका र निजी क्षेत्रका हेलिकोप्टर परिचालन गरिएका छन् । अहिलेसम्म झण्डै दुई हजार जनालाई हेलिकोप्टरबाट उद्धार गरिएको छ । उद्धार गरिएका व्यक्तिलाई रसुवाको धुन्चे र नुवाकोटको त्रिशूलीमा रहेको बट्टार होल्डिङ सेन्टरमा राखिएको छ ।

बाढीपछि त्रिशूलीदेखि रसुवागढी नाकासम्मको करिब ८० किलोमिटर पासाङ ल्हामु राजमार्ग नै अवरुद्ध हुँदा प्रभावित क्षेत्रमा उद्धार तथा राहत सामग्री पुऱ्याउन कठिनाइ भएको छ । खोज तथा उद्धारमा नेपाली सेना, नेपाल प्रहरी र सशस्त्र प्रहरी बलको संयुक्त जनशक्ति परिचालन गरिएको छ ।

प्रभावित क्षेत्रमा राहत तथा अस्थायी आवासका लागि पर्याप्त टेन्टलगायत सामग्री पठाइएको गृह मन्त्रालयले जनाएको छ । काठमाण्डौबाट पठाइएका उद्धार तथा राहत सामग्री नुवाकोटको त्रिशूली र रसुवाको धुन्चेमा सङ्कलन गरी आवश्यकता अनुसार वितरण थालिएको छ ।  यस्तै बाढी तथा पहिरोबाट प्रभावित क्षेत्रमा उद्धार, राहत वितरण र अवरुद्ध सडक पुनःसञ्चालनको काम तीव्र बनाउन सरकारले एकीकृत डिजिटल प्रणाली ‘सेतु र्‍यापिड’ सञ्चालनमा ल्याएको छ ।

गृह मन्त्रालयअन्तर्गतको राष्ट्रिय विपद् जोखिम न्यूनीकरण तथा व्यवस्थापन प्राधिकरण र सडक विभागको संयुक्त पहलमा यो पोर्टल तथा मोबाइल एप तयार पारिएको हो । सेतु र्‍यापिड प्रणालीमा उद्धार र राहत सामग्रीको माग गर्ने सुविधा छ । यो एफमार्फत हराएका व्यक्तिहरुको खोजीका लागि सरकारसँग अनुरोध पनि गर्न सकिन्छ । हराएका आफन्तहरुको विवरण नजिकैको प्रहरी कार्यालयमा उपलब्ध गराउन नेपाल प्रहरीले आग्रह गरेको छ ।