अस्ट्रेलियामा रहेको नेपाल ‘ए’ क्रिकेट टोलीले आज पहिलो एकदिवसीय अभ्यास खेल्दै

काठमाण्डौ – अस्ट्रेलिया भ्रमणमा रहेको नेपाल ‘ए’ क्रिकेट टोलीले आज पहिलो एकदिवसीय अभ्यास खेल खेल्दैछ ।

नेपाल क्रिकेट संघ ‘क्यान’ले नेपाल ‘ए’ का लागि तीनवटा अभ्यास खेलको तालिका सार्वजनिक गरेको हो । तालिकाअनुसार, नेपाल ‘ए’ टोलीले आज तास्मानियाको स्थानीय टोलीसँग पहिलो अभ्यास खेल खेल्न लागेको हो ।

त्यसपछि पर्सि शुक्रबार साउथ अस्ट्रेलियासँग प्रतिस्पर्धा गर्नेछ । र, अभ्यास शृंखलाको अन्तिम खेल आउँदो  आइतबार न्युजिल्यान्ड ‘ए’ सँग हुनेछ । यसअघि नेपाल ‘ए’ टोलीले अस्ट्रेलियामै भएको ‘टप एन्ड टी–२० सिरिज’ खेलेको थियो ।

टि–२० श्रृंखलामा नेपालले होबर्ट हुरिक्यास एकेडेमी र अस्ट्रेलिया क्यापिटल टेरिटोरीलाई हराएको थियो । त्यस्तै भिक्टोरिया एकेडेमी, नर्दन टेरिटोरी स्टाइक, बङ्गलादेश हाइ प्रफर्मेन्स टोली र किंग्समेन एकेडेमीसँग पराजित थियो ।

टी–२० को अनुभवपछि अब टोली एकदिवसीय फम्र्याटमा अभ्यास खेल खेल्न लागेको हो ।  यी अभ्यास खेलले नेपाली खेलाडीलाई बलिया टोलीविरुद्ध आफ्नो क्षमता परीक्षण गर्ने अवसर दिनेछ ।