एशियाली खेलकुदमा क्रिकेट खेलाडीहरूले उत्कृष्ट कोठा पाउँछन् : जापानी अधिकारी

काठमाण्डाै – एशियाली खेलकुदमा सहभागी हुने क्रिकेट खेलाडीहरूले अन्य धेरै खेलका खेलाडीहरूको तुलनामा राम्रो बसोवासको सुविधा पाउने जापानी अधिकारीले बताएका छन् ।

यही सेप्टेम्बर १९ देखि अक्टोबर ४ सम्म जापानको आइची नायोगामा हुने २०औँ संस्करणको प्रतियोगितामा खेलाडीहरूका लागि पाँच–तारे होटलको अभावबारे बढ्दो चिन्ताका बीच जापानी क्रिकेटका प्रमुखले यस्तो बताएका हुन् ।

श्रीलङ्कका एक अधिकारीका अनुसार एशियाका केही शीर्ष टोलीहरूले प्रतियोगिताका लागि उपलब्ध गराइएका सुविधा तथा बसोवासको व्यवस्थाबारे शङ्का व्यक्त गरेका छन् ।

जापानमा क्रिकेट एउटा सानो वा कम प्रचलित खेल हो र यसका खेलहरू विशेषरूपमा निर्माण गरिएको नयाँ मैदानमा खेलिनेछन् । यद्यपि त्यहाँ ड्रेसिङ रुमका रूपमा टेन्टहरूको प्रयोग गरिने र शौचालयको सुविधा निकै टाढा रहने खबरहरू आएका छन् ।

यी खेलहरूका लागि खेलाडीहरू बस्ने छुट्टै विशेष ‘भिलेज’ छैन । यसको सट्टा आयोजकहरूले क्रुज जहाजका क्याबिन, अस्थायी काठका कन्टेनरभित्रका कोठा र होटलहरूको व्यवस्था गरेका छन् ।

एशियाली खेलकुदका खेलाडीहरूको सङ्ख्या बढेर १७ हजार पुगेपछि आवासको व्यवस्थापन क्षमताको अन्तिम सीमासम्म पुगिसकेको आयोजकहरूले गएको हप्ता बताएका थिए ।

सन् २०२४ को फ्रान्सको पेरिसमा भएको ओलम्पिकमा खेलाडीहरूको सङ्ख्या झन्डै ११ हजार थियो ।