चन्द्रबहादुर थापा मगर र एरिका गुरुङ एनएसजेएफ उत्कृष्ट वर्ष खेलाडी घोषित

काठमाण्डौ – बक्सिङका चन्द्रबहादुर थापा मगर र करातेकी एरिका गुरुङ एनएसजेएफ पल्सर स्पोट्र्स अवार्ड २०८२ को उत्कृष्ट वर्ष खेलाडी घोषित भएका छन् ।

नेपाल खेलकुद पत्रकार मञ्च एनएसजेएफले हिजो काठमाण्डौमा आयोजना गरेको अवार्डको २३औँ संस्करणमा चन्द्रबहादुरलाई उत्कृष्ट पुरुष र एरिकालाई उत्कृष्ट महिला खेलाडीको अवार्ड प्रदान गरिएको हो ।

एरिका लगातार तेस्रोपटक वर्षकी उत्कृष्ट महिला खेलाडी घोषित भएकी हुन् । संयुक्त अरब इमिरेट्सको दुबईमा सम्पन्न अन्तर्राष्ट्रिय बक्सिङ महासंघ आईबाको पुरुष विश्व च्याम्पियनसिपमा कांस्य पदक जित्दै इतिहास रचेका चन्द्रबहादुर उत्कृष्ट पुरुष खेलाडी बनेका हुन् । उनी विश्व बक्सिङ च्याम्पियनसिपमा पदक जित्ने पहिलो तथा अहिलेसम्मका एकमात्र नेपाली बक्सर हुन् ।

यस्तै, एरिकाले गएको वर्ष अन्तर्राष्ट्रिय कराते प्रतियोगितामा उत्कृष्ट प्रदर्शन गरेकी थिइन् । करातेकी मनिषा कुमारी बोहरा उत्कृष्ट युवा वर्ष खेलाडी घोषित भएकी छन् । यस्तै, एरिकाको अन्तर्राष्ट्रिय सफलतामा महत्वपूर्ण भूमिका खेलेका कराते प्रशिक्षक कुशल श्रेष्ठ उत्कृष्ट प्रशिक्षक घोषित भएका छन् ।

भलिबलकी मीना सुनारले पिपल्स च्वाइस अवार्ड जितेकी छन् । नेपाललाई पहिलो दृष्टिविहीन महिला टी–२० क्रिकेटको फाइनलसम्म पुर्‍याउन महत्वपूर्ण योगदान गरेकी सुष्मा तामाङलाई पारा एथलिट सम्मान प्रदान गरिएको छ ।

यसैगरी, कराते प्रशिक्षक ध्रुवविक्रम मल्ललाई स्पेसल अवार्ड तथा ब्याडमिन्टन खेलमा जीवन समर्पण गरेका कुमार मोहनबहादुर शाहीलाई लाइफटाइम एचिभमेन्ट अवार्डबाट सम्मान गरिएको छ ।