नागढुङ्गा–मुग्लिङ सडक खण्डअन्तर्गत कृष्णभीरमा डाइभर्सन ट्रयाक खुल्यो

काठमाण्डौ – पृथ्वी राजमार्गअन्तर्गत नागढुङ्गा–मुग्लिङ सडक खण्डको कृष्णभीरमा भित्ता काटेर डाइभर्सन ट्रयाक खोलिएको छ ।

गएको भदौ १० गतेको बाढीले तलबाट जमिन कटान गरेपछि अघिल्लो हप्ता सडक भासिएको थियो । सडक भासिएको ठाउँमा हिजोदेखि भित्ता काटेर डाइभर्सन ट्रयाक खुलाउने काम शुरु भएको हो ।

निर्माण व्यवसायीहरूले नेपाल जियोटेक सोसाइटीका प्राविधिक, सडक विभागका प्रतिनिधि र विज्ञहरूको रोहवरमा डाइभर्सन ट्रयाक खुलाएका हुन् । निर्माण व्यवसायी महासंघका उपाध्यक्ष शहदेव खड्काका अनुसार भासिएको खण्डको २५२ मिटर ट्र्याक खोलिएको छ । खोलिएको ट्रयाकबाट अहिले नै गाडी चलाउन भने सकिँदैन ।

अहिलेलाई निर्माणमा प्रयोग हुने मेसिन हिँड्ने सडक बनेको र ग्रेड मिलाउने, पानी व्यवस्थापन र भित्ता सुधारलगायत काम पूरा गरेर बढीमा एक हप्तामा गाडी सञ्चालन गर्ने तयारी रहेको खड्काले बताउनुभयो ।

जटिल भूगोल र बाढीको जोखिमका कारण भासिएको सडकभन्दा माथि भित्तो काटेर ट्र्याक बनाइएको हो, जहाँ तत्काल कालोपत्र नगरी ग्राभेल गरेर दुईतर्फी गाडी सञ्चालन गरिनेछ ।

बाढीले कृष्णभीर, परेवाभीरसहितका विभिन्न ठाउँको सडक कटान गरी बगाएको थियो । जसका कारण पृथ्वी राजमार्ग अहिले अवरुद्ध छ ।सडक अवरुद्ध भएसँगै पश्चिम क्षेत्रबाट काठमाण्डौ नाका प्रवेश गर्ने सवारी साधनले सास्ती भोगिरहेका छन् । खाद्यान्न लगायत, अत्यावश्यक सामग्रीहरू आयात गर्न पनि असहज भएको छ ।

पृथ्वी राजमार्ग अवरुद्ध भएपछि सवारीसाधनलाई कान्ति राजमार्ग र त्रिभुवन राजपथतर्फ डाइभर्ट गरिएको छ भने वैकल्पिक ट्र्याक निर्माणको काम पनि अघि बढाइएको हो ।