एनभिएलमा मधेशको लगातार दोस्रो हार, काठमाण्डौ विजयी

काठमाण्डौ – नेपाल भलिबल लिग एनभिएलमा काठमाण्डौ रेड्सले विजयी शुरुवात गरेको छ ।

त्रिपुरेश्वरस्थित राष्ट्रिय खेलकुद परिषद्को कभर्डहलमा आज भएको खेलमा काठमाण्डौले मधेश वारियर्सलाई ३–२ को सेटमा पराजित गरेको हो । काठमाण्डौले पहिलो सेट २०–२५ ले गुमाए पनि त्यसपछि लगातार दुई सेट २६–२४ र २५–१७ ले जितेको थियो ।

चौथो सेट २२–२५ ले मधेशले जितेपछि खेल पाँचौँ सेटमा पुगेको थियो । निर्णायक सेटमा काठमाण्डौले १६–१४ को जीत निकाल्दै खेल आफ्नो पक्षमा पारेको हो । योसँगै मधेशले लगातार दोस्रो हार बेहोरेको छ । पहिलो खेलमा हिजो सगरमाथा स्म्यासर्ससँग पराजित भएको थियो ।

आजको दोस्रो खेलमा सगरमाथा स्म्यासर्स र खप्तड फाल्कन्सबीच बेलुका ७ बजे प्रतिस्पर्धा हुनेछ । यसअघि हिजो भएको उद्घाटन खेलमा सगरमाथाले मधेशलाई हराउँदै तथा अर्को खेलमा कर्णाली शिवराजले अन्नपूर्ण स्पाइकर्स किङ्सलाई हराउँदै विजयी शुरुआत गरेका थिए ।

एनभीएलमा ६ टोली सहभागी छन् । नेपाली पुरूष भलिबलमा पहिलो पटक आयोजना गरिएको फ्रेन्चाइज लिगको विजेताले २० लाख रुपैयाँ प्राप्त गर्नेछ ।