एनभीएलमा सगरमाथा स्म्यासर्सको लगातार दोस्रो जित

काठमाण्डौ – नेपाल भलिबल लिग(एनभीएल) मा सगरमाथा स्म्यासर्सले खप्तड फाल्कन्स सुदूरपश्चिमलाई सोझो सेटमा पराजित गर्दै लगातार दोस्रो जित हात पारेको छ ।

त्रिपुरेश्वरको दशरथ रंगशाला कभर्डहलमा हिजो बेलुकी भएको खेलमा सगरमाथाले खप्तड फाल्कन्सलाई ३–० को सेटमा हरायो । सगरमाथाले पहिलो र दोस्रो सेट समान २५–१८ ले आफ्नो पक्षमा पर्दै खेलमा पकड बनाएको थियो ।

तेस्रो सेट पनि २५–१९ ले जित्दै सगरमाथाले एकपक्षिय रुपमा खेल जित्यो । लगातार दुई खेलमा जित हात पारेको सगरमाथा ६ अंकसहित शीर्ष स्थानमा छ । सगरमाथाले उद्घाटन खेलमै मधेश वारियर्सलाई ३–१ ले हराएको थियो ।

हिजै भएको पहिलो थ्रिलिङ खेलमा काठमाण्डौ रेड्सले मधेश वारियर्सलाई ३–२ को सेटमा हराएर विजयी सुरुवात गरेको छ ।

एनभीएलमा आज पनि दुई खेल हुँदैछन् । पहिलो खेल अन्नपूर्ण स्पाइकर किङ्स र काठमाडौं रेड्सबीच दिउँसो ४ बजे शुरु हुनेछ भने कर्णाली शिवराज र खप्तड फाल्कन्सबीच बेलुकी ७ बजे दोस्रो खेल हुनेछ ।